Jazz / Samtids-
musikk

Mats Eilertsen Trio & Trio Mediaeval

Memora-
bilia

Anna Maria Friman; Linn Andrea Fuglseth og Jorunn Lovise Husan, vokal; Harmen Fraanje, piano; Mats Eilertsen, bass; Thomas Strønen, trommer. NXN Recordings NXN2003

 Det nyskipa plateselskapet NXN, eigd av Naxos Norge, har som mål å gje ut kvalitetsmusikk uavhengig av sjanger. Samarbeidet mellom Mats Eilertsen Trio og Trio Mediaeval er på alle vis ei realisering av programerklæringa. Prosjektet er likevel ikkje initiert av plateselskapet. Det blei tinga til Jazzfest i Trondheim i mai 2016. Innspelinga er gjort i studioet Newtone i januar og februar i år.

 Musikken er komponert av Eilertsen, innimellom med god hjelp av Strønen og Fraanje. Dei 17 låtane spenner frå harmonisk opne og rytmisk frie stykke til tidlegmusikkpastisjar. Med unnatak av seks instrumentalar er tekstane utdrag frå messetekstar og dikt av Tor Ulven. Sjølv om musikken er sjangermessig mangslungen, så heng han i den meditative grunnstemninga si godt i hop.

Å setja saman tekstane slik det her er gjort, gjev både messetekstane og Ulven-dikta ein tilleggsdimensjon, ein forsterka ambivalens. Instrumentallåtane står på eigne bein, men bind på gjennomtenkt vis saman det tekstbaserte materialet. Memorabilia har ein klar verkkarakter.

Dei to trioane er som skapte for kvarandre. Samklangen og nyanserikdomen i fraseringa til Trio Mediaeval står krystallklart fram i eit lydbilete som er velsigna transparent. Fraanje, Eilertsen og Strønen går på dynamisk vis inn i den tilbakehaldne komprolla for så på friare vis å halde på merksemda aleine i instrumentalane. Alt saman gjort på sedvanleg lyttande vis. Plata er tilrådd utan atterhald.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.