JAZZ

Atomic:

Six Easy Pieces

Magnus Broo, trompet; Fredrik Ljungkvist, saksofon og klarinett; Håvard Wiik, piano; Ingebrigt Håker Flaten, bass; Hans Hulbækmo, trommer
ODIN ODINCD9557

Med den 16. plata si er Atomic i det gåvmilde hjørnet. Ikkje berre serverer dei seks nye komposisjonar innspelt i Wien for knappe elleve månader sidan, men dei legg også ved ein dobbel-CD med eit to månader eldre liveopptak frå Pit-Inn i Tokyo. Konsertopptaket inneheld låtar frå Lucidity (2015) og Six Easy Pieces.

Intenst fokus

Atomic, som i byrjinga var ein alt anna enn stille protest mot ECM-estetikken som dominerte norsk jazz ved millenniumskiftet, har etter kvart blitt ein institusjon med ein svært tydeleg musikalsk profil. Besetninga har vore stabil. Berre Paal Nilssen-Love har gått ut av bandet, men Hans Hulbækmo har på rekordtid definert rolla si i bandet som om det å hoppa etter Wirkola var det naturlegaste i verda.

Wiik og Ljungkvist leverer låtmaterialet til bandet. Dei har kvar sitt særmerke temperament, noko som gjer repertoaret mangfaldig og spanande. Dette blir særleg tydeleg på studiodelen av Six Easy Pieces. Utan at energien og den laussleppte humoren manglar, er det eit intenst fokus på komposisjonane med all sin dynamikk og detaljrikdom.

Lett å lika

Konsertopptaka har sjølvsagt andre kvalitetar. Her er det meir rom for improvisasjon og innfall, men det ville ikkje vore Atomic om ikkje dei mange arrangementsgrepa tok musikken i stadig nye retningar. Om tittelen på plata er ei hylling til fysikaren og formidlaren Richard Feynman, skal vera usagt, men også Atomic har evna til å formidla komplisert musikk slik at han blir lett å forstå og lett å lika.

Lars Mossefinn

Lars Mossefinn er frilans kulturarbeidar og fast jazzmeldar i Dag og Tid.