JAZZ

Jon Eberson Group:

Bak jorda ein plass

Jon Eberson, gitarar, Hilde Marie Munroe Kjersem, vokal og Sigurd Hole, bass.
JEG RECORDS JEG005

Det er historisk sus over dette bandnamnet. 36 år har gått sidan førsteutgåva av Jon Eberson Group gav ut legendariske Jive Talking. Den noverande utgåva av bandet gav ut si første plate i 2010 med Comfort Call. Alt året etter var det duka for oppfølgjaren The Coarse Sand And The Names We Wrote. Den tredje plata har late venta på seg. Så dette er ei etterlengta utgjeving, og ho innfrir.

Eberson har skrive musikk og Kjersem har skrive tekst til åtte låtar som har ein melankolsk grunnstemning og går i ballade og til tider opp mot medium tempo. Nokre av låtane, mellom andre «Hvis du spør» og den Joni Mitchell-aktige «Desemberkvit», legg seg til rette i øyra med éin gong. Andre låtar må ein jobba litt med å få fatt i.

Det som imponerer aller mest, er det grundige arbeidet som er gjort med arrangementa, og måten bandet brukar studioet på. Eberson spelar både akustisk og elektrisk gitar. Dette berande elementet i arrangementa er utsøkt avstemt. Eberson tildeler seg sjølv avgrensa solistisk rom, men dei ytringane som kjem, er gjennomtenkte og særs velformulerte. Sigurd Hole fyller komprolla på ulasteleg vis.

Det vokale uttrykket til Hilde Marie Munroe Kjersem kler musikken til Eberson. Det er noko dystert i uttrykket hennar når ho syng i det lågare registeret. Ho nærast lespar fram teksten i «Alle bilar står». I neste omgang kan ho syngja i det øvre registeret med ein florlett vibrato. Det er ikkje dei store faktene som kjenneteiknar songstilen til Kjersem, men innspelinga avslører henne i kvar minste detalj, og det er godt å høyra på. Jon Eberson Group anno 2017 er skikkeleg hipt.

Lars Mossefinn

Lars Mossefinn er frilans kulturarbeidar og fast musikkmeldar i Dag og Tid.