R&B

Thundercat, OG Ron & The Chop-stars:

Drank

Brainfeeder

Vokalist og bassist Stephen «Thundercat» Bruner lagar silkemjuk funk, soul og R&B for vår tid. Det tredje albumet hans, Drunk, var ei av dei festlegaste og mest behageleg rusande platene i fjor. Der blei Marvin Gayes forførande og slibrige soul blanda med Frank Zappas frenetiske fusion, miksturen køyrd gjennom eit moderne produksjonsapparat og krydra med ei rekke meir og mindre obskure pop- og undergrunnskulturelle samplingar og referansar.

Drank er ei samling remiksar signert OG Ron & The Chopstars, ei gruppe som opererer i sjangeren «chopped and screwed». Desse nedsakka og opphakka spora læt i den eine augneblunken som det sjanglande minuttet før ein blir vist ut or ein nattklubb, i det neste som eit nachspiel i full forfjamsing, eller som den kvalme, desorienterte morgonen etter – og slik er det originalen burde ha høyrst ut, ifølgje Thundercat sjølv.

Kan hende fungerer desse forvridde remiksane vel så bra med tanke på tematikken rus og festing, men dei er uansett meir enn eit par hakk mindre tilgjengelege enn originalen. Dei har ein del til felles med interessante, men dryge musikalske internettrørsler som «vaporwave», der nedsakking av discolåtar frå åttitalet og andre dryge produksjonsteknikkar blir nytta i stor stil. Det er nok mest interessant for spesielt interesserte. Andre som ikkje har gjort det enno, kan heller unne seg eit møte med den originale plata Drunk.

Rasmus Hungnes

Rasmus Hungnes er musikar og fast platemeldar i Dag og Tid.