JAZZ

Bogue Chitto:

Reds Lounge

Marius Hirth Klovning og Haldor Røyne (5,8) gitar; Mattis Kleppen, bass; Are Rosselund, trommer.
JUST FOR THE RECORDS Jfr729

Dette er trioen som tidlegare var kjent under det litt tungvinte namnet Rosseklovnkleppen. No har dei henta namn på bandet frå ein småby i Mississippi, og platetittelen er kalla opp etter ein godt sliten bluesklubb i Clarkesdale, tre timar med bil nordvest for Bogue Chitto.

Det kan høyrast på musikken også. Medan debutplata Nett ein liten joggetur var sterkt inspirert av vestafrikansk musikk og ørkenblues, finn ein no i tillegg sørstatspåverknad, men i ei meir moderne og samansett form. I tillegg er påverknaden frå norsk folkemusikk tydlegare. Her har vel Mattis Kleppen gjort sitt?

Det mest markante endringa ligg likevel i arrangementa og bandsounden. Uttrykket er både blitt meir omarbeidd og variert, men også i mange tilfelle røffare. Bandet brukar studioet effektivt, og dei er ikkje redde for å pøsa på med romklang. Lyden blir likevel aldri sjenerande sølete. Debutplata hadde ein handfull fengande riff og melodisnuttar. Det er ikkje borte på denne plata, men dei greier å gje kvar einskild låt særpreg. Kleppen spelar på eit breitt register. Til tider, mellom anna i «Mellomspel», høyrest bassen ut som ein kora. Rosselund varierer heile tida mellom det stramme og det lause, når han skal halda att, og når han skal pøsa på.

Dette er først og fremst ein triumf for kollektivet – ei plate det er vanskeleg å la vera å dansa til.

Lars Mossefinn

Lars Mossefinn er frilans kulturarbeidar og fast jazz-
meldar i Dag og Tid.