Pop

Sigur Rós:

Odin’s Raven Magic

Krunk

Det er vikingtid i populærkulturen. TV-serien Vikings er til dømes tilbake med nye episodar, eit av storspela denne vinteren er Assassin’s Creed Valhalla, og det islandske postrockbandet Sigur Rós sleppte plata Odin’s Raven Magic kort tid før jol.

Her har bandet med seg Conservatoire de Paris-orkesteret og Schola Cantorum-koret, og skulptøren Páll Gudmundsson speler på eit sjølvlaga xylofonliknande stein­-
perkusjonsinstrument kalla Steinharpa. Musikken er tufta på «Hrafnagaldr Ódins», eit kontroversielt dikt med usikkert opphav og tvilsam posisjon i eddatradisjonen, og blei spelt inn live i Paris i 2002. Trass i at besetninga er enorm, læt musikken merkeleg spak og nølande. Vokalen er rett som det er sur, bruken av elektronisk støy er svært malplassert, og det læt jamt over som om både band, kor og orkester skulle tatt nokre fleire omgangar i øvingslokalet.

Ein detalj som imponerer meg ved Vikings, er bruken av den svenske elektronikaartisten Fever Rays låt «If I Had A Heart» som kjenningsmelodi. Denne moderne og unike songen meistrar å gi ei kjensle av noko norrønt utan å ta i bruk svulstige og slitne verkemiddel som manar fram førestillingar om mjøddrukne skaldar mellom snø- og isdekte fjordar og fjell. Same kompliment kan eg ikkje gi Sigur Rós. Dette er nordisk kitschmusikk, og når framføringa dessutan er såpass slarkete som dette, er mi tilråding at sjølv hardbarka fans hoppar over denne utgjevinga.

Rasmus Hungnes

Rasmus Hungnes er musikar, kunstnar og fast musikkmeldar i Dag og Tid.