Folkemusikk / Samtidsmusikk

Øster-
lide:

Østerlide

Liv Ulvik, vokal; Andreas Haddeland, gitar, bass, rubab, perkusjon; Ulrik Ibsen Thorsrud, trommer, perkusjon, klokkespel og sag. Tare Records Tare02CD

Den samiske musikaren Ulla Pirttijärvi gjorde Andreas Haddeland svar skuldig då ho spurde han kor han kom frå, og kva som var musikken hans. For å finna svar byrja han saman med Ulvik og Ibsen Thorsrud å gå djupare inn i den norske folkemusikktradisjonen. Denne utforskinga har resultert i ei utgjeving med ni låtar henta frå ulike delar av landet. Det er mykje velkjent stoff som mange har tolka før dei, som til dømes «Villemann og Magnhild», «Litle fuglen» og «Inga Litimor». Også to salmetekstar har dei funne plass til, Kingos «Nu rinder solen op av østerlide» og Dorothe Engelbretsdatters «Dagen viger og går bort».

Tekst og melodi står fram på krystallklart vis. Arrangementa innordnar seg og har nærast eit overvørdsamt forhold til melodistemma. Det klanglege bakteppet er til tider både mørkt og diffust, men gitaren og perkusjonen blir aldri påtrengjande. Også rytmisk held Haddeland og Thorsrud tilbake. Berre på «Signelita» og «Inga Litimor» utfordrar dei Ulvik. Det er likevel den dynamiske dimensjonen med musiseringa som imponerer mest. Å spela svakt er ein kunst. Den kunsten meistrar denne trioen til fulle. «Dagen viger og går bort» er ein perfekt miks av vokal fraseringskunst, dronegitar, basstromme og sag.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.