CD

Benjamin Britten:

Peter Grimes

Stuart Skelton, tenor; mfl.; Bergen Filharmoniske Kor, mfl.; Bergen Filharmoniske Orkester; dir.: Edward Gardner. Chandos 2020

Snart eitt år er gått sidan Bergen Nasjonale Opera sette opp Benjamin Brittens (1913–1976) Peter Grimes i Grieghallen, med Bergen Filharmoniske Orkester og ei samanslutning av fire kor. Liveinnspelinga av denne produksjonen ligg no føre på CD.

Operaen frå 1945 handlar om fiskaren Peter Grimes som har mista læreguten sin til sjøs. Sjølv om det var ei ulukke, mistenkjer folk i fiskarlandsbyen han for å ha skuld i dødsfallet. Sidan han ikkje klarer seg åleine, hentar han seg ein ny gut frå ein barneheim. Då også denne mister livet i ei ulukke, går landsbyfolket berserk – og Grimes går i døden, frivillig.

Dei som fekk med seg operaen i fjor og lyttar til albumet, blir minte om det høge nivået på framføringa. Bergen Filharmoniske Orkester realiserer Brittens kompliserte partitur med tett samspel og nøyaktig utførte detaljar, særleg i treblås- og slagverksseksjonen. Dei skifterike bylgjene av klang som velta innover publikum, kjem endå betre fram på plata enn eg hugsar det frå Grieghallen. Både songsolistar og kor er fyrsteklasses – hovudrolla som Peter Grimes kan knapt gjerast meir ramsalt enn det barytonen Stuart Skelton her presterer.

Sjur Haga Bringeland