Jazz

Mats Eilertsen:

Reveries & Revelations

Mats Eilertsen, bass, gitar, trøorgel og andre tangentinstrument; Geir Sundstøl, gitarar og banjo (1,9); Eivind Aarset, gitar (3); Arve Henriksen, trompet (10); Per Oddvar Johansen, skarptromme (10); Thomas Strønen, trommer, perkusjon og elektronikk (5,6,8). HUBRO HUBROCD2606

Denne soloplata til Mats Eilertsen skil seg markant frå det han har servert på andre utgjevingar. Både i musikalsk innhald og i arbeidsmåte er denne plata ganske atypisk og overraskande. Dette har ikkje vore ei innspeling i tradisjonell forstand. Eilertsen har spelt inn musikalske idear som han i neste omgang har sendt til Sundstøl, Aarset, Henriksen og Johansen og bede dei om bidrag spelt inn i dei respektive heimestudioa deira. Med Strønen var det omvendt. Eilertsen bad om innspelt materiale som han arbeidde vidare med. I tillegg har han spelt inn tre låtar utan bidrag frå andre.

Dette er ikkje ei solobassplate. Eilertsen er ikkje ute etter å syna seg fram som instrumentalist. Her er det komponisten Eilertsen som styrer skuta, men det musikalske universet er sterkt prega av bassens og orgelets djupare frekvensområde. Musikken spenner frå dystre droneinfiserte stykke til impresjonistiske tonemåleri. Aller best fungerer det på den magiske og arabisk-inspirerte «Nightride».

Eg oppfattar Reveries & Revelations som ein førebels rapport frå laboratoriet, eit spanande eksperiment der desse ideane blir testa ut for første gong. Sjølv om musikken står trygt på eigne bein, ser eg at dette har potensial til vidare utvikling, men eg har både kost meg med og grubla på denne plata i heile sommar.

Lars Mossefinn

Lars Mossefinn er lærar ved Voss gymnas og fast jazzmeldar
i Dag og Tid.