Samferdsel

Idar Mo

Oddgeir Havn meiner i Dag og Tid 3. november at kollektivtransport på stålskjener er betre enn bil på veg av ressursgrunnar. Det stemmer ikkje med offentleg statistikk.

Jernbana transporterer berre 1 prosent av personreisene i landet og utfører 3 milliardar personkilometer per år. Kvar person kostar 13 kroner for kvar kilometer han reiser, av det 9 kroner berre for bruk av dei eksklusive stålskjenene, som staten betalar 26 milliardar for årleg. Totalt yter staten årleg 31 milliardar årleg i tilskot til toget, og i tillegg betalar dei reisande kostnaden for billetten til togselskapet.

Bilen utfører 70 milliardar personkilometer årleg og avgifter dekkjer vegkostnaden. Medrekna vegkostnad kostar det om lag 3 kroner å transportere ein person i bil med 1,7 passasjerar. Togtransport er fire gonger så ressursbrukande som bil, men billegare enn bil er store godt utnytta bussar.

Det er plass til store flotte bussar på vegar som er betalte av bil og lastebil, og då vil meirkostnaden for vegbruk berre bli 8 øre for kvar kilometer ein person reiser med ein stor 80 seters buss med 60 passasjerar, som kan køyre gratis om staten flytter subsidiane til toget over på bussen og tidoblar reisande der. Desse bussane kan trafikkere 10.300 kilometer riksveg som dekkjer alle delar landet, i motsetnad til tog på 4000 kilometer på eksklusive stålskjener, og hente biltrafikk om billettprisen vert låg nok.