Utanriks

Vidar Lehmann

Med adresse til «Israel og grupper i Gaza» fordømde utariksminister Anniken Huitfeldt 11. mai alle åtak mot sivile og sivile dødsfall, inkludert born, vidare at alle aktørar måtte respektera internasjonal humanitærrett, medverka til de-eskalering og via politisk løysing hindra nye valdsutbrot.

Liknande ordbruk har gong på gong vore brukt når openberre uttrykk for Israels fordriving og undertrykking av palestinarar har kome til overflata. Å nøya seg med slik retorikk er som å pikka med skomakarhamar på Israels folkerettsstridige betongmur på Vestbreidda, alt medan stadig fleire israelske busetjingar skyt opp der, og nye generasjonar palestinarar forkjemst i den tettpakka og nedsota enklaven Gaza.

Ovafor det apartheid-styrte Sør-Afrika, fann vi det, med folkeretten i hand, rett å vera med på å stø motstanden, mellom anna med handelsboikott. Det same gjer vi no i høve Russlands folkerettsstridige åtak på Ukraina.

Så langt frå å vurdera boikott eller andre mottiltak mot Israel, har Noreg og Israel 12. januar 2017 signert ein omfattande intensjonsavtale om samarbeid innan utvikling og forsking. I omtalen av avtalen er det frå israelsk hald nemnt at norsk kompetanse kan vera relevant i høve gassproduksjon i havet utafor Israel. I 2018 vart det òg vedteke ein bilateral traktat om landbruk.

Ifølgje innlegg i Aftenposten 18. april 2023 hevdar leiar i Palestina-komiteen, Line Khateeb, at Kongsberg våpenfabrikk har eit samarbeidstilhøve til den militærtilknytte israelske organisasjon Rafael. På grunngjeve spørsmål frå stortingsrepresentant Bjørnar Moxnes 10. februar 2023 om rakettar frå Israel har norskproduserte komponentar, svara Huitfeldt at Noreg ikkje sel våpen til land i krig, men at når Noreg ikkje er nemnt kan norske komponentar inngå i våpen som andre land lagar og eksporterer.

Stadig færre hugsar Ap-utariksminister Johan Jørgen Holst (1937–1994) sin internasjonale innsats, ikkje minst i den palestinsk-israelske konflikten (Oslo-avtalen). Mykje tyder på at det intense engasjementet i samband med Oslo-avtalen kosta Johan Jørgen Holst både helse og levedagar. Ikkje dess mindre, og med adresse noverande regjering: Det er på høg tid at norske myndigheiter tek opp att arven etter ein av dei fremste medlema til Arbeidarpartiet.