Samferdsel

Oddgeir Havn

3. april 2009 vart det sett verdsrekord i fart for eit konvensjonelt tog med 574,8 km/t på linja Paris–Strasbourg.

Då var jernbanetransport ei stigande stjerne i heile verda.

I 2012 kom Tesla Model S, ein stor 5/7-seters sedan. Etter det har jernbanetransport vore ei dalande stjerne.

Det store spørsmålet er transport på veg eller på stålskinner. Her kan det argumenterast for det eine eller det andre i det vide og det breie, men den store forskjellen er individuell eller kollektiv transport.

I 2022 passerte folketalet på kloden 8.000.000.000 menneske og vil ifølgje prognosar frå FN nærme seg 10.000.000.000 i 2050.

Det burde dermed vere innlysande for dei fleste at kollektiv transport er det rette i framtida.

Men det var rasjonell tenking, som kjent er det noko vi menneske driv lite med, kfr. diverse krigar i verda.

Den eine tanken som kanskje kan få oss på rett spor, er at personbilen er den største forbruksvara vi held oss med, og at ein afrikanar eller indar har like stor rett til å bruke dei naturresursane som går med til å lage ein Tesla, som Ola Dunk.

Det er det sjølvsagt ikkje nok resursar til på kloden.

Mi klare oppfordring til transportminister Jon-Ivar Nygård er: Flytt pengar frå firefelts veg til tospors bane. Då vil ny bergensbane og Nord-Noreg-bane kome mykje nærmare i tid.

Elles anbefaler eg alle å lese boka Bilen mot menneske av Kenneth R. Schneider som kom på norsk i 1972.