Naturvern

Olaf Gjedrem

Dag og Tid skriv om jordvern i førre utgåve. Ei viktig sak for land og folk.

Det er venta at regjeringa i vår legg fram for Stortinget forslag om at det ikkje skal byggjast ned meir enn 2000 da dyrka jord per år. Dette er eit viktig steg for sjølvforsyninga og mattryggleiken vår. I tillegg ynskjer me at det vert sett ei tilsvarande grense på 2000 da for nedbygging av dyrkbar jord. I tillegg foreslår me at det vert ulovleg å planleggja bustadar, næringsområde og parkeringsplassar på dyrka og dyrkbar jord.

Jordlova sitt vernekrav må setjast over plan- og bygningslova. Kommunane må ta ny behandling av dei 80.000 da dei har fått godkjent til utbygging, og føra mesteparten tilbake til landbruk. Det offentlege må få sterkare verkemiddel eller verktøy for å sikra jordvernet.

Me foreslår òg å utvikla ei digital ordning som gir ei meir rask, påliteleg og presis oversikt over kommunane sine utbyggingsplanar og høve til å stoppa ulovleg planlegging. Jordbruksareal som ligg inneklemt i by og tettstader i gode klimasoner må bli gitt eit spesielt vern.

På bakgrunn av skuffande tal frå KOSTRA, som syner sterk auke i nedbygging av dyrka og dyrkbar jord i 2022, hastar det å få eit strengare vern. Difor er forventninga at Stortinget vedtek effektive vernetiltak slik at det ikkje vert nedbygd meir enn 2000 da dyrka og 2000 da dyrkbar jord i løpet av 2025.

Olaf Gjedrem er i er leiar i Jordvern Norge.