Samferdsle

Jon Hustad

jon@dagogtid.no

I førre veke omtalte Dag og Tid kostnadssjekken som Holte Consulting har gjort av planane om å flytta flyplassen i Bodø 900 meter. Kostnaden vert om lag 6 milliardar, og Holte rekna seg fram til at alle pengane vart bortkasta. Flyttinga gjev ingen samfunnsøkonomisk verdi, meiner dei.

Det er Avinor som er faginstansen som driv flyplassen no, og som skal flytta han. Dag Falk-Petersen er konsernsjef i Avinor, som støttar flyttinga.

– Eg vil likevel understreke at det ikkje er Avinor som har sagt at det er trong for å flytta flyplassen. Det er det Bodø kommune som har ynskt. Men at det er trong for å utbetra flyplassen, er tvillaust. Han er frå 1950 og ligg på grunn som rører på seg. I 2014 såg vi på to alternativ: Anten å lata rullebana liggja der ho ligg, og grava ned til botnen, eller å flytta rullebana 60 meter mot sør. Då kom vi til at det truleg var billigare å flytta bana 60 meter, men no har vi kome til at det har omtrent same kostnaden.

– Men likevel har de laga eit alternativ som inneber å flytta flyplassen 900 meter?

– Ja, Bodø kommune har no når Forsvaret skal flytta, ynskt å frigjera store areal for byutvikling. Dette har Bodø fått støtte for både frå regjeringa og Stortinget i Nasjonal transportplan. Eg meiner det er meiningslaust å ha ein flyplass som i praksis vert liggjande midt i byen. I tillegg vil det å flytta han 900 meter få bort støyproblema. No flyg vi inn over tettbygde område, med ein ny flyplass flyg vi ut og inn over sjøen.

– Det var meir støy då Forsvaret var der, og offentlege prosjekt har det med å gå på ein budsjettsprekk?

– Vi i Avinor er flinke til å halda oss til budsjettet, vi plar ikkje gå på budsjettsprekkar. Vi har kome til at om vi skal vera på den gamle flyplassen, vil det gje oss ein kostnad på rundt 1,5 milliardar over 20 år. Desse pengane kan vi nytta til å byggja ny flyplass. I tillegg får vi truleg rundt 300 millionar for sal av dagens flyplass. Dimed kan vi leggja 1,8 milliardar på bordet. Det å flytta eller det å verta verande vert for oss eit nullsumspel.

– Men de er ikkje åleine om å betala?

– Nei, staten har sagt at han kan stilla opp med 2,2 milliardar, resten skal Bodø kommune dekkja. Både vi, Forsvaret og Bodø kommune har vore svært medvitne om å halda kostnadene nede. Og med denne løysinga får vi frigjort store areal, som kjem Bodø og innbyggjarane der til gode.

– Det du i grunnen seier, er at dette er ei rein politisk avgjerd og ikkje eit behov som Avinor har?

– Ja, vi kunne ha utvida den noverande rullebana og laga ekstra kapasitet. Så flyttinga er eit resultat av politiske føringar. Men du bør gå inn på Google Maps, så ser du kor god løysing det er å flytta flyplassen. Når han vert flytta ein kilometer mot sørausts, vert han liggjande på den andre sida av eit høgdedrag. Bodø vert ein mykje betre by av denne flyttinga. Flyttinga er fyrst og fremst byutvikling som vi støttar fullt og heilt.