På industristaden Dale har utvinning av bitcoin skapt eit lite opprør denne sommaren. Naboane til Kryptovault byrja i vinter å høyra ei konstant susing. Dei fann ut at ulyden kom frå bitcoinfabrikken. Støyen var plagsam både ute og inne, og det vart så gale at det gjekk på helsa laus.

Evy Kvamme er ein av naboane som reagerte sterkast. I juni vart det arrangert folkemøte på Dale, og der la Kryptovault seg flat. Etter dette har det kome krav til bedrifta om redusert støynivå på 35 desibel om natta, 40 om ettermiddagen og 45 på dagtid.

– Er du nøgd med det?

– Eg ville nok helst hatt 35 desibel heile døgeret, men på altanen min var det på verste nesten 65 desibel. Det har me hatt sidan januar og fram til 1. juni, og det har vore heilt grufullt. Me fekk ikkje sova og måtte setja på radio og fjernsyn og utstyra oss med proppar i øyro for å overdøyva lyden. Slik skal det ikkje vera.

Som okkupantar

– Kva synest folk på Dale om å få denne bedrifta i dei gamle fabrikklokala?

– Det er ingen som vil ha henne der. Det gjekk lenge før me fekk vita kva som skjedde på fabrikken. For meg verkar det som om dei er okkupantar som har teke seg til rette utan å ta omsyn til andre enn seg sjølve. På møtet gav eg klart uttrykk for at dei var kyniske spekulantar som er ute etter å tena raske pengar.

– Trur du Kryptovault har framtida for seg på Dale?

– Eg har ikkje tru på bitcoin i det heile. Det høyrer ikkje nokon stad heime å etablera ei slik bedrift så nær sentrum og busetnad. Kryptovault omtalar seg som industri, men det dei driv med, har ingenting med industri å gjera. Dei har ikkje råvarer, og det er ikkje noko ein kan kjøpa hjå dei. Dei har omtalt seg som datasenter, men no er det berre snakk om bitcoin, seier Evy Kvamme.

Støy på Follum

Denne veka kunne Ringerikes Blad fortelja om sterke reaksjonar frå naboane på Kryptovaults fabrikk på Follum ved Hønefoss. Der starta Kryptovault opp ved påsketider, og naboane reagerer sterkt på støyen.

– Me er heilt fortvila, uttalte tre av dei på vegner av 30 naboar.

Dei viste til at dei ikkje kan vera ute i hagane, og at dei må stengja vindaugo for å dempa støyen. Ein av naboane har målt støynivået til 75 desibel, og folk har problem med å få sova. Naboane fortel også at dei fleire gonger har vore i kontakt med Kryptovault utan at noko har skjedd. Men talsmann for Kryptovault, Gjermund Hagesæter, fortel til Ringerikes Blad at det er sett i gang tiltak for å betra på tilhøva.

Då Finansavisen var på besøk i bedrifta for ei tid sidan, dura kjøleviftene i papirfabrikken «så høylytt at to personer ikke må stå lenger fra hverandre enn 30 centimeter for å høre hverandre», skriv lokalavisa.

I dag har Kryptovault om lag 9000 datamaskiner på Follum, men det er plass til 25.000. Naboane fortel til lokalavisa at dei er orienterte om at Kryptovault har planar om å dobla kapasiteten med det første, og dei vonar at det raskt vert gjort noko for å redusera støynivået.