Tidlegare EU- og EØS-minister Vidar Helgesen (H) og noverande minister Frank Bakke-Jensen (H) meiner det har lønt seg for Noreg å ha ein eigen dedikert EU- og EØS-minister. Helgesen seier ministerposten mellom anna påverka utfallet av forhandlingane om norske EØS-midlar.

Gjennom forhandlingane som vart ferdige i 2015, plikta Noreg seg til å betale 388 millionar euro årleg i EØS-midlar i perioden fram til 2021. Summen svara til ein auke på nær 40 millionar euro frå perioden før, og inneber ein mindre auke enn ved forhandlingsrundane under den raudgrøne regjeringa.

– Her trur eg det hjelpte å ha ein eigen statsråd med ansvar for den porteføljen EØS-midlane er, og at det var ei kjernesak i porteføljen, og ikkje arbeid som skulle vegast mot andre utanrikspolitiske prioriteringar og omsyn, seier Helgesen.

– treng minister

Han er ikkje samd med Ap-leiar Jonas Gahr Støre i at ansvaret for EU- og EØS-saker vel så gjerne kan liggje hjå utanriksministeren.

– Eg er oppteken av Norden og Nord-Europa som region i ei verd som er stadig meir trøblete, og eg meiner eit styrkt nordisk samarbeid i europapolitikken og Nord-Europa er viktig. Då trengst det å ha ein eigen europaminister med blikk på dei europeiske samarbeidsprosessane. Når ein norsk utanriksminister møter den svenske kollegaen, vert det jo ofte snakk om Midtausten, Nord-Korea og andre viktige globale spørsmål, seier han.

Nøgde med resultat

Noverande EU- og EØS-minister Frank Bakke-Jensen seier han jobbar mest med brexit, oppfølginga av EØS-midlane og «det å vere tidleg inne når ein politisk idé vert fødd i EU».

Han seier Solberg-regjeringa hausten 2013 oppdaga at EUs nye reglar for redusert arbeidsgivaravgift ikkje lenger gjaldt for sektorane transport, energi og finans. EUs regionalstøtteregelverk hadde vorte revidert medan den raudgrøne regjeringa stod på sidelina, seier han.

– Vi har fått til endringar i ettertid slik at transport og energi er inne att. Samstundes signaliserer vi allereie no kva som er norske interesser inn mot den neste revidering av regionalstøtteverket, seier han.

– Trengst det ein eigen EU- og EØS-minister for å få til det?

– Det er umogleg å svare på. Vi kan jo berre måle resultata. Det vi registrerer, er at vi har løyst nokre av sakene dei raudgrøne ikkje klarte å løyse med ein utanriksminister. Om det var fordi dei ikkje ville vektleggje arbeidet med EU eller ikkje, vert meir eit retorisk spørsmål. Vi er i alle fall veldig nøgde med resultata vi har oppnådd, seier Bakke-Jensen.