Astronautar måtte naudlande

To astronautar på veg mot Den internasjonale romstasjonen (ISS) måtte torsdag naudlande kort tid etter utskyting av romfartøyet Soyuz frå ein base i Kasakhstan. Det varsla den amerikanske statlege romfartsorganisasjonen NASA via Twitter i går. The Independent melder at det vart oppdaga ein stor funksjonsfeil ved romfartøyet, men at dei to astonautane kom trygt ned på jorda att. Astronautane, ein russar og ein amerikanar, skulle til Den internasjonale romstasjonen, som går i bane rundt jorda i ei høgd på omtrent 386 kilometer, for å hjelpe med reparasjonar.

Nederlendar vil til EU-toppen

Den nederlandske politikaren Frans Timmermans har stadfesta at han ønskjer å overta som EU-kommisjonspresident etter luxembourgaren Jean-Claude Juncker neste år. Det skriv nyhendenettsida Euractiv. Timmermans, som i dag er visepresident i kommisjonen og Junckers høgre hand, har sagt at han vil leie partiet sitt, det nederlandske arbeidarpartiet PvdA, i valet til Europaparlamentet i mai og vere hovudkandidaten til den sosialistiske og demokratiske gruppa EU-parlamentet.

PvdA gjorde eit dårleg val i fjor, men Timmermans reknar likevel med at statsminister Mark Rutte skal nominere han som kommissær igjen.

Monsanto ankar

Ein dommar i California har opna for at det kan verte ny rettssak for Monsanto og eigaren, farmasigiganten Bayer, etter at dei tidlegare i år vart dømde til å betale ein kreftpasient 289 millionar dollar. Det skriv avisa The Guardian.

Det var ein jury i San Francisco som i august kom til at ugrasmiddelet Roundup frå Monsanto truleg hadde gjeve den 46 år gamle skulegartnaren Dewayne Johnson krefttypen Non-Hodgkins lymfom. Johnson skal ha brukt Roundup for å drepa ugras på skulen, og skal ved fleire høve ha fått stoffet over heile kroppen på grunn av vind. Juryen meinte Monsanto visste, eller burde ha visst, at Roundup kunne medføre kreft, og dømde selskapet til å betale 250 millionar dollar i straff, i tillegg til 39 millionar dollar for å gje Johnson eit betre liv.

California-dommaren Suzanne Bolanos meiner det manglar bevis som kan rettferdiggjere den store straffesummen, og har gjeve uttrykk for at ho vil redusere denne og ha ei ny rettssak.