Dansk nei til kvoteflyktningar

Den danske utlendings- og integrasjonsministeren Inger Støjberg har avgjort at Danmark ikkje skal ta mot kvoteflyktningar i 2018, melder Politiken.

Sjølv om me har fått langt betre styr på tilstrøyminga, kjempar me med å få integrert dei mange flyktningane som har kome til Danmark dei siste åra, seier ho.

Det danske Folketinget vedtok i fjor ei ny og strammare kvoteordning, som blant anna medfører at det er opp til utlendings- og integrasjonsministeren å fastsetja talet på flyktningar som skal busetjast i Danmark. Støjberg har brei oppslutnad i Folketinget. Alle partia i den blå blokka, pluss sosialdemokratane seier nei til å ta mot 500 flyktningar gjennom FN-systemet, slik dei gjorde før.

Slutt for bensinbilar

Ei rekkje europeiske land har planar om å stogga salet av bensinbilar. Denne veka vedtok Europaparlamentet at CO2-utsleppa skal reduserast med 40 prosent fram til 2030. Dermed gjekk dei endå lenger enn EU-kommisjonen, som gjekk inn for 30 prosent. Sjølv om det er ministerrådet, og ikkje parlamentet, som har siste ord i saka, skaper meldinga uro i bilindustrien.

Regjeringane i både Danmark, Holland, Irland og Tyskland vil forby sal av nye diesel- og bensinbilar frå 2030. Både Storbritannia og Frankrike siktar seg inn mot 2040, medan Noreg har det meir travelt med 2025 som mål, skriv Politiken.

Elefanttenner og tigerbein

Den ulovlege handelen med dyr er utbreidd i Myanmar. Nær Thailand, Laos og Kina, der dei sjeldne dyra vert brukte i tradisjonell medisin, aukar etterspurnaden. Nyleg gjennomførde styresmaktene i Myanmar ein operasjon der det vart funne 850 kilo med delar av dyr som det ikkje er lov å jakta på. Det er snakk om blant anna elefanttenner, tigerbein og antilopehorn til ein verdi av 1,3 millionar dollar, melder TT.

ottar@dagogtid.no