REINDRIFT

Christiane Jordheim Larsen

christiane@dagogtid.no

– Eg forstår at Norske Reindriftssamers Landsforbund (NRL) ønskjer å endre lova for å styrke rettane til reindrifta, men utfordringa med det dei føreslår, er at ei lovendring vil omfatte alt og alle, ikkje berre reindrifta, og vil i realiteten kunne stoppe all kraftutbygging i Noreg.

Slik reagerar stortingsrepresentant Lene Westgaard-Halle (H) på NRL sitt krav om å fjerne høvet utbyggjarar i dag har til å starte utbyggingar før erstatningar og samiske rettar er rettsleg avklarte.

Den såkalla Fosen-dommen gjer kravet aktuelt, fordi Høgsterett i fjor haust kjende konsesjonsvedtaket til to store vindkraftverk på Fosen-halvøya i Trøndelag ugyldig på grunn av brot på folkeretten. Her er samisk reindrift ei verna kulturutøving.

Stortingsrepresentant Torgeir Knag Fylkesnes (SV) ser annleis på saka.

– SV har ikkje tatt stilling til forslaget, men eg forstår det. Etter Fosen-dommen er dette kravet frå reindrifta eit krav vi må sjå på. Det kan vere fleire utbyggingar som må gjerast om, seier han.

Følgjer opp dom

Landbruks- og matdepartementet finn det ikkje rett å kommentere forslaget, sidan det er fremja i kravet til årets reindriftsavtale. Staten legg fram sitt tilbod 27. januar.

«Når det gjelder oppfølging av Fosen-dommen er NRL gjort kjent med at regjeringen parallelt med forhandlingene om Reindriftsavtalen 2022/2023 vil komme tilbake til NRL med en redegjørelse om regjeringens videre oppfølging av Fosen-dommen, herunder hva slags prosess man legger opp til å gjennomføre for å avklare hvilke kortsiktige og langsiktige tiltak som vil bli iverksatt for å sikre reindriften på Fosen,» skriv departementet i ein e-post.

Avventande bransje

Vindkraftnæringa er forsiktige med å meine noko om forslaget frå NRL, utover å understreke at omsynet til reindrifta er viktig i arealsaker og har eit spesielt folkerettsleg vern som skal ivaretakast. Bransjen avventar no resultata av prosessane i Olje- og energidepartementet knytte til høgsterettsdommen, dialogen mellom utbyggjarane og reinbeiteutøvarane på Fosen, samt utarbeiding av ein ny konsesjonsprosess for vindkraft.

«Vår forståelse er at det ikke er mulig å si nå hva utfallet av disse prosessene blir. Det er også verdt å ta med seg at det vil ta tid før nye konsesjoner blir gitt, grunnet stans i all konsesjonsbehandling. Det er derfor heller ikke klart hvilke lovendringer som eventuelt bør komme i oppfølgingen, og vi har ikke vurdert forslaget fra NRL, utover at det åpenbart er viktig å unngå slike situasjoner for fremtiden», skriv direktør Øistein Schmidt Galaaen i bransjeorganisasjonen Norwea i ein e-post.