Utanriksdepartementet har ført mange kampanjar for norske kandidatar i FN, men strevet for å få Gro Harlem Brundtland vald som sjef i Verdshelseorganisasjonen (WHO) var i særklasse. Offensiven byrja allereie før Brundtland gjekk av som norsk statsminister i 1996, og Gudmund Hernes samanlikna det med kampen for å få OL til Lillehammer. Sjølv sende Hernes hyggelege brev til mellom andre Muammar Gaddafi i Libya for å fortelje om kvalifikasjonane til Brundtland. Det vart oppretta eit sekretariat på fem personar i UD for å drive kampanjen, i tillegg bidrog over hundre tenestemenn og 40 ambassadar i arbeidet.

Mest interessant i denne samanhengen er det at Noreg i 1996 auka dei frivillige norske bidraga til WHO med 45 prosent samanlikna med året før. Med 118 millionar i støtte vart Noreg dermed den fjerde største frivillige bidragsytaren til WHO-budsjettet. Og i 1998 vart Gro Harlem Brundtland ny sjef for Verdshelseorganisasjonen.