Jon Hustad

jon@dagogtid.no

Jordan Peterson heiter ein kanadisk psykologiprofessor. I fleire år har han laga filmsnuttar frå førelesingar og lagt dei ut på nettet. Men ingen høyrde på han, før plutseleg nær alle høyrde på han. No har han vorte rik og vidgjeten etter særleg å ha kritisert postmodernisme, radikal feminisme og identitetspolitikk. Somme meiner Peterson er fascist, andre ser på han som den nye Messias, dei meir nøytrale meiner han er ein klassisk sjølvhjelpsguru. No kjem han til Noreg, og ein av dei fyrste som kjøpte billett, var rådgjevaren til Sylvi Listhaug, Espen Teigen, som òg skal møta Peterson privat.

– Kva tid fekk du fyrst høyra om han, og i kva samanheng?

– Eg nyttar Youtube ein god del, og ikkje berre til å sjå søte kattevideoar. Der såg eg eit klipp med Peterson i ein tøff debatt med ein professor i kjønnsstudiar, vedkomande sa at det ikkje eksisterte biologiske skilnader mellom menn og kvinner. At ein velutdana person kunne seia noko slikt, tykte eg var interessant og verdt å sjekka ut. Då byrja eg å høyra på førelesingane hans, og eg syntest at han hadde mykje å koma med som gjorde at brikkene i puslespelet fall meir på plass.

– Kva er hovudbodskapen hans?

– Hovudbodskapen hans trur eg ein god del menn har trong for å høyra, men ikkje har fått høyra på lenge: Reis deg opp, tak plassen din i verda, arbeid og stå på for å nå måla dine og handsam dei rundt deg godt! Han relanserer gamle dygder som er intuitive med solid og fagleg argumentasjon. Han argumenterer dessutan for ein del tradisjonelle sanningar som er under åtak, til dømes at det for nesten alle er openberre skilnader på menn og kvinner. Han går òg til åtak på offermentaliteten der folk skal rangerast i grupper alt etter kor undertrykt ein er. Om du går på eit av dei fremste prestisjeuniversiteta, vert det for dumt å hevda at du er undertrykt av det fæle samfunnet.

– Eg har sett ein del på føredraga hans og lese litt av han, og eg tykkjer han er springande og litt rotete. Men likevel verkar det som mange unge menn finn han enkel å forstå. Eller handlar det om karisma?

– Det handlar vel om ulik smak. Eg liker stilen hans særs godt. Førelesingsstilen hans er litt som å ha ei lang tankerekkje der han freistar å løysa problem og diskutera for å koma fram til sanninga. Eg tykkjer han har ein forfriskande måte å snakka på, og eg meiner at han er flink til å halda interessa oppe.

– Kva er det som gjer han så kontroversiell? Er det noko feil i be unge menn skjerpa seg? Og er det ikkje sant at det er mange marxistar og venstreorienterte i akademia?

– Nei, unge menn treng å få høyra at dei må skjerpa seg. Og det er ingen tvil om at det er mange venstreorienterte i akademia. Eg trur einskilde oppfattar han som kontroversiell av di dei ikkje har fått med seg utviklinga i nordamerikansk akademia der kvite amerikanarar no skal be om orsaking for at dei er kvite, eller som på Evergreen State University, der kvite studentar og tilsette skal vera borte éin dag av di dei er kvite. Det har gått så til dei grader i grøfta at ein lærarassistent vart dregen framføre ein disiplinærkomité av di ho synte fram eit klipp av Peterson i ein debatt på statleg canadisk fjernsyn. Det har også vore mange tilfelle der kjende konservative har vorte utsette for både vald og hærverk for å hindra dei i å snakka offentleg på universiteta.

– Men dette er Nord-Amerika og ikkje Noreg?

– Vi fekk ein smakebit på dette underlege og radikale fenomenet i Noreg då Siv Jensen fekk massivt med kritikk for å taka på seg eit indianarkostyme, av di det var såkalla «kulturell appropriasjon». Vi treng absolutt ikkje importera meir av dette tullet til Noreg. Men vi ser utviklinga innanfor til dømes kjønnsstudiar, der ein skal analysera alt gjennom kolonitidbriller. Sjølv om Noreg ikkje hadde mykje til koloniar, har dei direkte omsett og importert tøvete idear rett i norsk akademia. Eg trur vi vil sjå meir av dette i tida framover, og det går fyrst og fremst ut over folks tiltru til forskings- og utdaningsinstitusjonane våre.

– Korleis fekk du landa avtalen om å møta han? Er han skap-Frp-ar og tilhengjar av Listhaug?

– Eg kjøpte VIP-billett og tok kontakt. Eg trur neppe han er Frp-ar, eller veit kven Listhaug er. Det vert spanande, eg skal stilla han nokre vanskelege spørsmål.