– Du er skeiv!

Jenta ropar over støyen frå miksebordet på Rokken, studenthuset i Volda. Eg har ikkje snakka med henne før, og smiler til henne over ølglaset mitt. Eg tenkjer meg om. Er det fordi eg har ring i nasen? Opp til fleire i øyra? Eller kanskje kan det vere fordi eg held fram med å barbere bort håret på den eine sida av hovudet lenge etter at det slutta å vere trendy?

– Er eg det?

Ho nikkar. Tek att påstanden ein gong til.

– Du er skeiv.

For to veker sidan fekk det kristne miljøet i Ørsta og Volda på Sunnmøre brev med invitasjon til eit seminar om homofili. Møtet skulle haldast i løyndom. Det skulle ikkje kunngjerast i aviser eller på sosiale medium.

«I seminaret vert det høve til spørsmål og samtale, men det er ikkje ein arena for sterke meiningsytringar eller debatt. Fokuset vårt er kunnskapsauke, bygd på Bibelen», heiter det. Han som skulle tale for den kristne forsamlinga, er sjølv homofil og kristen, men har valt å leve åleine. Brevet hamna sjølvsagt både i avisa og på Facebook innan nokre timar. Og få dagar etter, var møtet avlyst.

Då eg las saka om seminaret i lokalnyhenda, forsvann auga mine bakover i skallen og handflata kolliderte med panna mi med éin gong. Eg var samd med mannen som først publiserte brevet han hadde fått i posten på Facebook: «Dette er 2017. Dette er året etter sesong 3 av SKAM», skreiv han.

Men veit vi eigentleg kva dette hemmelege møtet i Ørsta skulle gå ut på? Sjølv om møtet skulle haldast hemmeleg; veit vi at dette skulle vere eit møte mellom homofiendtlege erkekristne? Jau, valet av talsmann kan verke uheldig. Dei kan då verkeleg ikkje meine at homofile kristne skal leve i sølibat, tenkte eg. Og det er suspekt at møtet måtte haldast hemmeleg. Men veit vi at det utgjorde ein slik trugsel at det måtte avlysast? Det er lett å tru det. Men det er ikkje sjølvsagt at det er rett.

Øverland skreiv rett nok ikkje om homofile den gongen han meinte vi ikkje måtte tole så inderleg vel, men skal vi få alle kristne til å endre meining om homofili, må Bibelen omskrivast. Då det kom framlegg om felles Pride-arrangement for Ørsta og Volda som svar til det hemmelege møtet, såg eg smilande føre meg regnbogeparade opp fjellsida mot Rotsethornet. Neonsminke, fjellsko og meir openheit. Om dei kristne i Ørsta og Volda berre vil auke kunnskapsnivået, må dei vere tydelege på kva dei vil lære. Men om vi vil nekte dei å samlast for å snakke om homofili i lys av eiga tru, er vi noko betre då?

Vi må tole at vi er usamde.