Da den nordkoreanske statsleiaren Kim Jong-il døydde i 2011, og den 30 år gamle sonen Kim Jong-un tok over makta i Pyongyang, vona somme Nord-Korea-observatørar at dette kunne bli starten på ein reformprosess i det lukka landet. Den nye leiaren hadde gått på skule i Sveits, og skal ha vist sans for amerikansk basketball og pizza. Men slike preferansar er ingen garanti for eit liberalt sinnelag.

Den unge Kim har liberalisert økonomien litt, men han har elles stått for ein enda hardare politikk enn faren, både utanriks og innanriks. På heimebane har han fått avretta eit hundretal generalar og andre tenestemenn han ikkje stolte på, blant dei fleire statsrådar og hans eigen onkel Jang Song Thaek. I februar i år myrda nordkoreanske agentar halvbroren Kim Jong Nam med nervegift på flyplassen i Kuala Lumpur.

Kim Jong-un har trappa opp både atomprogrammet og rakettutviklinga i Nord-Korea etter at han tok over makta. I fjor utførte Nord-Korea atomprøvesprenging nummer fire og fem. Den siste bomba var den klart største så langt, med ei sprengkraft som kan ha vore på same nivå som Hiroshima-bomba. Og medan Nord-Korea gjorde 18 rakettoppskytingar i løpet av dei 18 åra Kim Jong-il styrte landet, har det vore over 40 oppskytingar på dei fem åra Kim Jong-un har hatt kommandoen. Kim den tredje ser ut til å prioritere avskrekking gjennom atomvåpen enda høgare enn faren gjorde. Og det skal truleg svært mykje til før han vil gje opp desse våpena.