Om nokon land skal vere i stand til å presse fram ei endring av den destruktive politikken til Nord-Korea, er det Kina. Etter at handelen med Sør-Korea stogga heilt opp, er det aller meste av utanrikshandelen til Nord-Korea med kinesarane, inkludert importen av essensielle varer som olje. Også det meste av bankverksemda til regimet i Pyongyang går gjennom Kina. Om USA skal klare å presse Nord-Korea til å gje opp atomprogrammet sitt, må truleg kinesarane med på laget.

Det er ikkje heilt utenkjeleg: Heller ikkje Kina er nøgd med den risikable politikken til Nord-Korea. Relasjonen mellom dei to kommuniststatane var ikkje hjarteleg under den kalde krigen heller. Mao skal ha vore lite glad for at Kim Il-sung invaderte Nord-Korea i 1950. Men Kina kjende seg nøydd til å gripe inn i krigen for å berge Nord-Korea frå totalt nederlag, og kinesarane skal ha mista kring 200.000 mann. Da Kim Il-Sung igjen ønskte å invadere Sør-Korea i 1975, inspirert av USAs nederlag i Vietnam, skal kinesarane ha sagt nei til å støtte han.

Irritasjon

Dei siste tiåra har Kina hatt stabilitet i Nord-Korea som mål, og har gjennom bistand og handel bidrege til å halde regimet i Pyongyang ved makta. Kinesarane har frykta brå omveltingar som kunne føre til ein stor flyktningstraum over grensa.

– Leiarane i Beijing ville nok gjerne sett eit demilitarisert, stabilt Nord-Korea som innførte marknadsreformer på same vis som andre land i regionen, meiner Stein Tønnesson. Men han tviler på at leiarane i Pyongyang vil våge ei slik opning: Det kan fort ende med at regimet fell.

– Det er stor irritasjon i Beijing over leiarskapen i Nord-Korea. Men kinesarane ønskjer seg ikkje Nord-Korea som fiende. Rakettane til Nord-Korea kan òg nå Beijing. Og Kina ønskjer definitivt ikkje eit sameint Korea, som truleg vil bli dominert av USAs allierte Sør-Korea.

Kva vil Kina gjere?

Det store spørsmålet er kor langt Kina vil gå for å leggje press på Kim Jong-un. Donald Trump, som inntil nyleg truga med toll på kinesiske importvarer til USA, har no blitt oppteken av å bli ven med Kina. Trump har hevda at Kina vil «hjelpe USA» med Nord-Korea, men ingen veit kva dette kan innebere, påpeikar Tønnesson.

– Om kinesarane vil, kan dei strupe Nord-Korea. Dei kan stenge grensa og stogge oljeleveransane og pengestraumen til landet. Dei kan òg sende styrkar til grensa for å leggje ekstra press på Kim. Men det vil vere risikabelt også for Kina.