Ingen kunne vite sikkert kor mange arbeidsinnvandrarar som ville kome til Noreg etter at EU tok inn ti nye medlemsland i 2004. Men vi kan i dag slå fast at overslaga som den norske regjeringa opererte med før utvidinga, var himmelropande feil. I ein rapport frå regjeringa hausten 2003 vart eit overslag frå ein rapport tinga av Nordisk ministerråd nytta, rett nok med mange atterhald om at dette var usikker vitskap: Det var til saman venta 5000 nye arbeidsinnvandrarar til Noreg frå dei nye medlemslanda dei neste fire åra, og 9000 innan 2014.

Kva vart fasiten? I 2014 var det nær 160.000 arbeidsinnvandrarar frå dei austeuropeiske EU-landa i Noreg, syner tal frå SSB. Det er nesten 18 gonger fleire enn regjeringa hadde sett for seg før EU-utvidinga. I tillegg kjem fleire titusen arbeidarar frå Aust-Europa som er på kortare opphald i Noreg.

Jon Erik Dølvik, forskar i den LO-tilknytta forskingsstiftinga Fafo, uttalte seg i 2003 til Dagens Næringsliv på grunnlag av overslaget på 9000 innvandrarar på ti år; han meinte det låge talet viste at det ikkje var grunn til uro. «Det er ingen grunn til å overdrive frykten for at østeuropeere vil strømme til Norge for å finne arbeid når EU 1. mai neste år utvider grensen mot øst», meinte Dølvik.

«Samtidig skal man være klar over at arbeidsinnvandring kan bli et problem for enkelte bransjer. Men det er ingen grunn til å se for seg en allmenn strøm av mennesker til Norge», sa Dølvik, som rett nok tok eit atterhald: «Med dagens konjunkturbilde er det usikkert hva som vil skje.»