ESA med nye skyts mot Noreg

Kan krav om kompensasjon for reise, kost og losji for dei som jobbar langt heimanfrå, vere del av minstekrava for løns- og arbeidsvilkår i tariffavtalar som gjeld alle som jobbar i verftsindustrien, byggjebransjen og reinhaldsbransjen? Ja, meinte Noregs Høgsterett i 2013, i dommen i den såkalla verftssaka. EFTAs overvakingsorgan ESA er ikkje samd og varsla i 2016 sak mot Noreg for brot på EØS-avtalen.

I eit brev til arbeidsminister Anniken Haugli skriv overvakingsorganet no at eit nyleg revidert EU-direktiv, det såkalla utstasjoneringsdirektivet, styrkjer ESAs syn om at kompensasjon til reise, kost og losji ikkje kan allmenngjerast.

Polen og Ungarn har elles bede EU-domstolen ta stilling til om det reviderte utstasjoneringsdirektivet, som slår fast prinsippet om lik løn for likt arbeid på same stad, er i strid med EU-retten.