På Stortinget er det berre SV og Raudt som vil ha tannlegetenestene inn i folketrygda. SV vil at staten skal refundere alle tannlegeutgifter over 2500 kroner, og ønskjer statleg fastsette takstar for behandlinga. Raudt vil fjerne eigendelen for alle helsetenester, og at tannlegetenester skal drivast av det offentlege.

I Arbeidarpartiet har tannhelse vore omstridt i mange år. I 2009 og 2011 gjekk landsmøtet inn for å gjere tannhelsetenester til eit offentleg ansvar, men leiinga følgde ikkje opp vedtaket. I 2015 vedtok Ap-landsmøtet eit tak for eigenbetaling for tannbehandling, men også dette vart oppheva. I partiprogrammet i dag heiter det at Ap vil ha betre tannhelseordningar for dei med dårleg økonomi. Også Høgre, Frp, KrF, Venstre og Sp har formuleringar om at dei vil lage eit betre tannhelsetilbod for folk med dårleg råd.

Framstegspartiet har før gått inn for at tannbehandling skal inn i folketrygda. I Frp-programmet heiter det no at partiet vil «bedre refusjonsordningene for sykdomsrelatert tannbehandling, og på sikt redusere kostnadene til egenandeler på lik linje med øvrig helsebehandling».