Fleire mistar livet på veg over Middelhavet

Talet migrantar og flyktningar som kjem til Europa, held fram å gå ned i 2018, og vart frå siste veka i januar til fyrste veka i februar redusert med 67 prosent, ifølgje den internasjonale organisasjonen for migrasjon, IOM. Det til trass så aukar delen personar som mistar livet eller forsvinn på veg over Middelhavet. Så langt i 2018 har 8965 flyktningar og migrantar kome til Europa, medan 401 personar har mista livet på vegen. Det vil seie at over fire prosent av dei som har reist, ikkje har kome fram. I 2017 forsvann 1,6 prosent av dei som la ut på ferda over Middelhavet, medan 1,2 prosent forsvann i 2016. Over halvparten av migrantane til Europa i år har kome til Italia, medan Spania har teke imot nest flest og Hellas tredje flest. Migrantane som har kome til Italia, er i hovudsak frå Nigeria, Republikken Guinea, Elfenbeinskysten, Bangladesh, Mali og Eritrea. Til Spania har det kome migrantar frå Morokko, Algerie, Guinea, Elfenbeinskysten, Gambia og Syria, medan syrarar, irakarar, afghanarar, kongolesarar og pakistanarar utgjer hovuddelen av migrantane til Hellas.

Ikkje et frukostblanding

Er du lei av at alt som er kjekt og enkelt, fører til kreft og sjukdom? Då vil du ikkje lika denne notisen. No har ein svær studie i regi av Sorbonne Paris og universitetet i Sao Paulo synt at ferdigmat og kraftig prosessert mat aukar risikoen for kreft sterkt. 105.000 vaksne deltok, og forskarane fann at om du et 10 prosent meir ferdigmat, sukra frukostblandingar og snacks, går risikoen for kreft opp med 12 prosent. Dette har britiske medium slått stort opp, sidan halvparten av alle kaloriar britane får i seg, kjem frå slik mat. Forskarane seier også at sidan vi et stadig meir av slikt dårleg fôr, vil helseutgiftene auka sterkt i dei komande tiåra. På toppen av dei heile aukar slik mat overvekta i folkesetnaden, og ein BMI på over 25 aukar risikoen for minst 11 ulike typar kreft. Men det er ikkje all prosessert mat som er dårleg. Mat som berre var litt prosessert, som pasta og ris og hermetiske grønsaker, hadde ingen negativ effekt. Dei som åt ris, pasta, ferskt eller frose kjøt, fisk og egg i kombinasjon med mykje frukt og grønt, hadde den lægste risikoen for å få kreft. Så då er det berre å skrida til verket. Nekt ungane frukostblanding og kok havregraut. 1,1 kilo lettkokt havregryn kostar berre 19,90, tek tre minutt å koka, og om du berre held deg til havregraut, får du i deg 2200 kaloriar per pakke. Det er billig, det.

Kvart sjette barn lever i konfliktområde

357 millionar barn, som vil seie kvart sjette barn i verda, lever i ei konfliktsone, ifølgje ein ny rapport frå Redd Barna. Det er ein auke på 75 prosent sidan starten av 90-talet. Rapporten «The War on Children» syner òg at talet barn som har vorte drepne eller lemlesta i krig er tredobla sidan 2005. Dei farlegaste konfliktlanda for barn i 2016 var ifølgje rapporten Syria, Afghanistan, Somalia, Jemen, Nigeria, Sør-Sudan og Irak.