Ikkje sidan 90-talet har det kome så få asylsøkjarar til Noreg som no. Det inneber at Utlendingsdirektoratet ikkje berre legg ned den ekstra mottakskapasiteten som vart bygd opp i samband med flyktningkrisa, men òg fleire mottak drivne over fleire år.

Frode Forfang, som er direktør i Utlendingsdirektoratet, skreiv i eit blogginnlegg tidlegare i haust at alle typar driftsoperatørar har måtta avvikle mottak, men at det i tal er private aktørar som har redusert mest. Når alle dei per no varsla mottaksavviklingane er gjennomførte 1. april neste år, kjem likevel nær 60 prosent, eller 23 av 39 attverande mottak til å vere private, medan elleve vil vere kommunale og fem ideelle. Det syner tal frå UDI, som inkluderer ordinære mottak, transittmottak, integreringsmottak og mottak for einslege mindreårige.

Medan det rundt årsskiftet 2015/2016 var over 30.000 bebuarar i norske asylmottak, er talet rundt 7000 i dag.

Dag og Tid har spurt UDI i kva grad det er teke omsyn til historikk, kontinuitet og innhald i arbeidet på mottaket når Sunndal mottak er vedteke lagt ned.

– Vi har hatt svært gode erfaringar med mottaket i Sunndal og det lokale engasjementet rundt mottaket. Etter å ha lagt ned mange mottak det siste halvtanna året, er det derimot berre godt drivne mottak vi står att med, svarar regiondirektør Rune Vordahl i eit e-brev.

Det er ifølgje UDI for tida ikkje nok ledig kapasitet til at alle bebuarane ved Sunndal får ny mottaksplass i same region. Enkelte kjem såleis til å verte flytta til mottak i andre regionar.

– Etter at Sunndal vart vedteke nedlagt kom det nye bebuarar til mottaket, familiar med barn som no har starta på skulen i Sunndal. Kva er tanken bak slike mellombelse flyttingar?

– Dette vart gjort for at desse familiane skulle få halde fram med å bu saman. Då måtte vi bruke plassar ved Sunndal asylmottak, som var det einaste mottaket som hadde ledige familieplassar. Òg i framtida kjem det til å vere avgrensa tilgang til familierom, og andre familiar kjem difor til å måtte bu seg på fleire flyttingar, skriv Vordahl.