Frankrike vil hente heim IS-barn

Frankrike vil hente barn fødde av franske IS-sympatisørar heim til Frankrike frå Syria, medan mødrene skal overlatast til straffeforfølging hjå lokale styresmakter i Syria, melder Reuters.

Ifølgje nyhendebyrået er det rapportert om 60 kvinner frå Frankrike i Syria, og totalt 150 barn som anten er tekne med til Syria som barn eller er fødde i landet. Fleirtalet av barna er under seks år gamle. Franske styresmakter har så langt nekta å hente heim både IS-krigarar og kvinnene som reiste saman med dei for å støtte den islamske staten.

Høgrepopulistisk ­toppmøte i januar

Det nærmar seg val til Europa­parlamentet, og den belgiske politikaren Michaël Modrikamen jobbar med å samle og styrkje høgrepopulistane gjennom organisasjonen The Movement. Organisasjonen, som vart skipa i 2016, fekk i sommar tidlegare Trump-rådgjevar Steve Bannon med på laget. No planlegg organisasjonen det fyrste toppmøtet i EU-hovudstaden i januar.

I eit intervju med nettsida EU Observer seier Modrikamen at dei håpar å få med medlemmer frå både Trump-regjeringa og Tea Party-rørsla på toppmøtet.

Moderaterna vil vrake Bildt

«Sjølvsagt er eg djupt skuffa», skreiv den svenske EU-parlamentarikaren Anna Maria Corazza Bildt på Facebook-sida si denne veka.

Nominasjonskomiteen i partiet hennar, Moderaterna, har ifølgje Bildt bestemt seg for å vrake henne frå lista til europaparlamentsvalet neste år. Grunngjevinga er at partiet gjorde eit dårleg europaval i 2014.

Bildt, som har sete i Europaparlamentet sidan 2009, har vanskeleg for å forstå og akseptere avgjerda. Ho skriv at ho gjorde eit betre europaval førre gong enn nokon andre i Moderaterna. Og ho har tydelegvis ikkje heilt gjeve opp å kunne stille igjen: «Avgjerda ligg no hjå partirådet den 23. november», skriv ho på Facebook-sida si.

eva@dagogtid.no