Khashoggis siste spalte

The Washington Post publiserte onsdag denne veka ei siste spalte frå den forsvunne saudiarabiske journalisten Jamal Khashoggi. Der skriv han om mangelen på fri presse i den arabiske verda, som han meiner står overfor ein eigen versjon av eit jernteppe – «ikkje pålagd av eksterne aktørar, men av innanlandske styrkar som kjempar for makt». Han opnar spalta, som har tittel What the Arab world needs most is free expression, med å syne til rapporten Freedom in the Wold frå 2018, publisert av Freedom House, der berre eitt land i den arabiske verda vert klassifisert som fritt. Det er Tunisia. Jordan, Marokko og Kuwait er klassifiserte som delvis frie, medan resten av landa i den arabiske verda er klassifiserte som ikkje frie.

Redaktøren til Khashoggi i avisa har i eit forord til spalta skrive at ho fekk teksten frå omsetjaren og assistenten til Khashoggi dagen etter han vart meld sakna i Tyrkia.

Khashoggi, som var fast skribent i Washington Post, vart ifølgje tyrkiske styresmakter drepen på det saudiarabiske konsulatet i Istanbul. Han har ikkje vorte sett sidan han gjekk inn i bygget 2. oktober.

Gresk minister-exit

Den greske utanriksministeren Nikos Kotzias gjekk denne veka av etter ein krangel med forsvarsminister Panos Kammenos om namneavtalen med Makedonia. Kammenos skal ha skulda Kotzias for pengmisbruk, ifølgje EU Observer. Kammenos leiar nasjonalistpartiet Uavhengige grekarar og har trua med å gå frå regjeringa som følgje av avtalen statsminister Alexis Tsipras og Kotzias har inngått med Makedonia. Ifølgje avtalen skal Makedonia endre namn til Nord-Makedonia.

#Metoo i India

I september nådde #metoo-bølgja for alvor India. Da fortalde skodespelaren Tanushree Dutta (biletet) om seksuell trakassering i filmbransjen, og mange andre indiske kvinner kom fram med sine eigne historier i vekene som følgde. Denne veka slo #metoo også inn i indisk politikk, da politikaren og pressemannen M.J. Akbar trekte seg frå ei toppstilling i utanriksdepartementet etter fleire offentlege skuldingar om trakassering av kvinner. Akbar hevdar sjølv å vere uskuldig, men valde altså likevel å gå av.

eva@dagogtid.no