Jesper Hommefoss
Johnsen

jesper@dagogtid.no

– Eg vil seie at fersk fisk er i ein tilstand som gjer han etande og velsmakande, seier Dagfinn Nordbø, som skriv om mat og reiser i Dag og Tid.

Sjølv er han ingen ekspert på fisk, berre ein glad amatør, påpeiker Nordbø. Han seier at det finst faglege debattar på kor mange dagar fisk kan liggje. Somme likar fisk som ikkje er blodfersk. Medan andre meiner han smakar best butikkfersk.

Det er restauranteigar Roar Hildonen einig i. Han seier det er forskjell på smaken i ulike land.

– I Noreg har vi tradisjon for å ete heilt fersk fisk, fordi vi er vane med at han er tilgjengeleg rett utanfor døra. I til dømes Frankrike er det mange som lar skreien modne i minst to dagar.

I tillegg er det forskjell på fiskeslag. Villaks og andre feite fiskesortar kan godt liggje nokre dagar.

– Fisken skal vere fast og lukte friskt av sjø. Er han blaut, har han lege for lenge.

Om ein går innom fiskedisken, har både Hildonen og Nordbø eit heitt tips:

– Eitt tips er å sjå på auga – dei skal vere blanke og fine.

Kjølerekkje

Kor lenge fisken held seg, kjem òg mykje an på kva behandling han har fått, seier Nordbø.

– Ubroten kjølerekkje er eit viktig stikkord. Fisken må ha låg nok temperatur og skal ikkje liggje i kjøleskapet for lenge.

Nordbø presiserer at dette er hans lekmannsoppfatning. Sjølv er han oppteken av å ikkje vente for lenge med å bruke fisken. Fisk som er gått ut på dato, er han skeptisk til.

– Andre varer, som ost eller kjøt, kan ein ofte ete etter datomerkinga har gått ut. Somme likar til dømes storfekjøt som har modna litt i pakninga.

– Korleis kan ein vite at fisken enno er god?

– Du må bruke nasen. Bruk alltid nasen om du er i tvil om ei vare er god eller ikkje. Om du ikkje har korona, då sjølvsagt.

På spørsmål om kva han synest om at det er vanskeleg å drive fiskebutikk i Noreg, svarar Nordbø følgjande.

– Det er trist med kvar fiskebutikk som må leggje ned. Fisk har diverre vorte dyrt i Noreg samanlikna med andre land.