Per Anders Todal

peranders@dagogtid.no

– Det er alltid ein fare for å bli sjølvgod, og eg vil åtvare mot å fremje norsk havforvalting som ein modell for verda. Men det er ein del ting vi er gode på i Noreg, seier Peter Haugan.

Han er forskingssjef ved Havforskingsinstituttet og har leidd ekspertgruppa som står bak hovudrapporten til Havpanelet.

– Det er bra at Noreg lagar forvaltingsplanar for store havområde, som tek omsyn til at ulike næringar skal sameksistere. Vi er flinke til å dele data og snakke saman på tvers. Men vi har ein del å gå når det gjeld å gjere gode politiske val og bruke berekraft som kriterium. Kunnskap er berre eit verktøy, det er ikkje nok om dei politiske avgjerdene ikkje er gode. Vi kan bli betre til å gjere dei vala som er best for alle på lang sikt, ikkje berre det som tener nokre få aktørar på kort sikt.

Haugan var sjølv med på å formulere avsnitta om leiteboring til havs i hovud­rapporten til Havpanelet, der forskarane slår fast at slik leiting ikkje er sameinleg med ein berekraftig havøkonomi.

– Når politikaren deler ut nye lisensar til leiteboring, går det ikkje saman med bodskapen i den rapporten dei bestilte. Men vi må sjå på arbeidet til forskarane i panelet som eit bidrag til politikkutvikling, det er ikkje eit minste felles multiplum av det som finst i dag. Eg kan ikkje seie meir enn at panelet har sagt sitt, seier Haugan.