Norden diskuterer kven som får vera med

Korleis ein kan skapa eit meir inkluderande kulturliv, var tema for konferansen «Nordisk kulturpolitisk dag» som Kulturrådet arrangerte i samarbeid med Kulturanalys Norden i Stockholm.

– Ein betre representasjon av menneske med fleirkulturell bakgrunn i kulturinstitusjonar er viktig fordi han endrar arenaen i seg sjølv. Det er også med på å definera kva draumar og ambisjonar me som fleirkulturelle har, seier kunstnaren Sandra Mujinga, basert i Oslo og Malmö.

Ho var ein av paneldeltakarane under Nordisk kulturpolitisk dag i Stockholm 29. januar, fortel Kulturrådet i ei pressemelding. Tema for dagen var «Vem får vara med?» som omhandla utfordringane og moglegheitene kring eit inkluderande kulturliv i Norden. Konferansen var eit samarbeid mellom Norsk kulturråd og KulturAnalys Norden, eit statleg analyseorgan basert i Sverige. Sveriges Kultur- og demokratiminister Alice Bah Kuhnke og påtroppande statssekretær Frida Blomgren ved det norske Kulturdepartementet, opna konferansen. Blomgren gav ei helsing frå kulturminister Trine Skei Grande, som minte om at Jeløya-plattformen var klar på å setja i gang ein inkluderingsdugnad, og at nettopp dette temaet var ei av dei tinga som gjorde at ho ynskte seg kulturministerposten.