Norske styresmakter har ikkje sett nokon grunn til å innføre tiltak mot kinesiske aktørar i den norske marknaden, sjølv om Noreg etter alt å døme har fått sin del av auken i kinesiske utanlandsinvesteringar dei siste åra.

Dag og Tid har spurt Nærings- og fiskeridepartementet kva EU-kommisjonens nye tiltak overfor Kina får å seie for Noreg, og om det er behov for same typen tiltak i Noreg.

Statssekretær Magnus Thue (H) svarar at Noreg ikkje er omfatta av EUs handelspolitikk, men at norske styresmakter følgjer med på utviklinga i EU.

– Vi ønskjer ein meir balansert handel med Kina i den forstand at vi ønskjer at norske bedrifter skal ha betre tilgang til den store kinesiske marknaden. Difor ønskjer vi å få på plass ein frihandelsavtale for å leggje til rette for auka samarbeid innan handel og investering, seier han.

– EU-kommisjonen ønskjer å opne for å kunne hindre utanlandske selskap å levere anbod på offentlege kontraktar. Kan det vere aktuelt for Noreg?

– Noreg har plikt til å la utanlandske verksemder delta i innkjøpsprosessar om dei kjem frå EØS-land, land som er tilslutta WTO-avtalen om offentlege anbod, eller land som Noreg har frihandelsavtalar med som inkluderer offentlege anbod. Kina er ikkje omfatta av dette. Offentlege styresmakter kan likevel tillate kinesiske selskap å delta for å få betre konkurranse om innkjøpet, seier han.

Per i dag finst det ikkje noka heilskapleg oversikt over kor stort volumet av kinesiske investeringar i Noreg er. SSB har tal som syner ein nedgang i verdi av investeringar frå Kina frå 31,6 milliardar kroner i 2013 til 11,6 milliardar kroner i 2017, men den statistikken fangar ikkje opp investeringar som skjer via selskap i land utanfor Kina.

Analysar som European Think-tank Network on China har gjort av kjende kinesiske investeringar, stadfestar likevel at Noreg har hatt ein auke, og at auken i Noreg er stor jamført med situasjonen i Europa generelt.

Ifølgje rapporten, som Norsk utanrikspolisk institutt har vore med å utarbeide, investerte kinesiske selskap for i alle fall 56 milliardar kroner i Noreg mellom 2002 og 2016. Truleg er talet likevel noko høgare, ifølgje rapporten.

– Er det grunn til uro over kinesiske investeringar i Noreg?

– Vi har gode erfaringar med utanlandske investeringar i Noreg, også dei frå Kina, seier Thue.