Jon Hustad

jon@dagogtid.no

Så har endå ein frå Møre og Romsdal gjort det stort ute i verda. Onsdag vart Ole Gunnar Solskjær utnemnd til sjeftrenar i verdas største fotballklubb målt etter omsetning, Manchester United. Kjetil K. Haugen er professor i logistikk og fotballeiing ved Høgskulen i Molde.

– Er dei så viktige, desse managerane?

– Det kan sjå slik ut, for Manchester United skal ikkje vera så dårlege som dei har vore i år. Om ein sjeftrenar skapar konflikt, og konflikt har det vore i Manchester United, endar det med at spelarane ikkje prøver så godt dei kan. Og gjer dei ikkje det, er laget dømt til å tapa kampar.

– Men all statistikk syner at det er ein nær absolutt samanheng mellom kor mykje pengar du har, og resultat?

– Ja, samanhengen er der, men det vil ikkje seia at du kan tilsetja ein dyr og dårleg manager. Samanhengen er meir komplisert enn som så. Ein god manager kan instruera spelarane til å gjera det rette og gje dei sjølvtillit. Desse trenarane er dyre, og det er dei som vert tilsette i dei store klubbane. Dimed måler du dei aller beste managerane i dei rikaste klubbane når du ser på samanhengen mellom pengar og resultat. Då har pengar noko å seia, men det tyder ikkje at dårlege managerar automatisk får gode resultat om dei har mykje pengar.

– Men statistikken har ein klar anomali, Brian Clough, han vann alt i England og Europa utan pengar?

– Ja, men som vi veit, anomaliar skal ein heller ikkje leggja vekt på. Alle marknadar har unnatak, det vil ikkje seia at generell marknadsteori er feil. Eg meiner det er ein større anomali at Molde kom seg til Champions League. Ja, det er ei stund sidan, men ein by på 25.000 skal då ikkje kunne vera med i Champions League. Men det igjen tyder på at det er mogleg i fotball å få resultat med lite pengar. Sidan fotball er så komplekst og har så mange potensielle utfall, veit vi at det er strategiar som enno ikkje er prøvde ut. Nye strategiar kan oppstå i små klubbar og hjå ukjende managerar. Dimed kan dei små framleis slå dei store, og det er noko av venleiken i fotballen.

– Men no skal Solskjær få bruka mykje pengar på nye spelarar?

– Ja, men igjen vil ikkje det seia at han får dei beste. Fotballmarknaden er ikkje perfekt, vi snakkar ikkje om hyllevarer på Rema her. Om du får kjøpa den beste spelaren, avheng av klubben din, klubben du kjøper frå, og om andre klubbar vil ha spelaren. Det er på ingen måte gjeve at den beste spelaren hamnar i den rikaste klubben. Det kan vera at Manchester United er der Liverpool var i mange år, at dei var rikast og hadde vore best, men at dei beste spelarane ikkje ville dit på grunn av manglande resultat eller feil manager.

– Moderne managerar er intelligente, er Solskjær skarp nok?

– No kjenner eg han ikkje, men det trur eg. Då han var student her på høgskulen, fortalde kollegaer som underviste han i matematikk, at han var særs skarp der. Eg trur ikkje han vantar intelligens. I tillegg verkar han sympatisk og roleg, det har nok også noko å seia. Når det er sagt, så lyg nok glansbiletet litt, du vert ikkje så god som han var, og du vert ikkje manager i Manchester United om du berre er snill. Han har nok brutaliteten som skal til.

– Men er det så bra at Alex Ferguson går der enno? I alle åra Matt Busby gjekk att på Old Trafford, gjorde klubben det elendig. Skjer ikkje det same no?

– Klisjeen er at det er vanskeleg å hoppa etter Wirkola, og ja, det er ser ut å vera vanskeleg å taka over etter Nils Arne Eggen og Alex Ferguson. Men på den andre sida sett, at Solskjær vert oppfatta som ein Ferguson-mann, kan gje han ein autoritet han elles ikkje ville ha hatt. Spelarane er på ingen måte så dårlege som resultata skulle tilseia, troppen er god nok til at United både kan koma vidare i Champion League og koma seg opp mellom dei fire beste i Premier League. Solskjær kan ha flaks, sjølv om eg nok ikkje tur sjansen er stor.