Eg er dårleg i magen. Det er vintersesong i India, men framleis for varmt. Dei andre i reisefølgjet har reist for å bade, eg sit att på kafeen på gjestehuset i tempelbyen Hampi og drikk te.

– God morgon!, seier ein israelsk backpacker på bordet ved sida av. Han reiser seg og legg eit samanbretta kart på bordet mitt.

– Sidan du er dårleg, skal du få ei overrasking, seier han, smiler lurt og går.

Eg skjønar ikkje så mykje før eg brettar ut kartet. Tre ørsmå brune klumpar som luktar sterkt, litt grasaktig og søtleg, ligg i eit kvitt A4-ark inni kartet. Eg har fått hasj.

Det første eg gjer er å klaske papiret og kartet i hop att. Eg røykjer ikkje hasj. Eg har faktisk aldri røykt ein sigarett i heile mitt liv.

Kva er det med denne vesle klumpen som er så freistande, tenkjer eg. Og kva i alle dagar skal eg gjere med han? Eg ser ned på papiret.

Nulltoleransen min for slike rusmiddel har halde fram så lenge eg kan hugse. Særskilt sidan ein sommarleir som tenåring: Ein av venene mine kom att midt på natta etter å ha nytta hasj og amfetamin for første gong, og veninna som sleppte han inn – høg både i lydvolum og på sentralstimulerande stoff – måtte distrahere den vaksne «nattevakta». Venen vart avhengig med éin gong, og den eine gongen eg snakka med han på telefonen etter dette, hadde han stole medisinar av bestemor si. I åra etter visste eg ikkje om han framleis var i live.

«Rusavhengige skal få behandling i staden for fengselsstraff», gjekk Stortinget inn for i 2017. Historisk, melde VG. Men politiet er redde for ufarleggjering, og forskar Sverre Nesvåg ved Regionalt kompetansesenter for rusmiddelforsking i Helse Vest spør kva ein skal gjere med dei som nyttar cannabis, som ikkje er avhengige. Det er merkeleg å sende dei i behandling, meiner han i same avis.

Jau, men er det ikkje endå merkelegare å freiste å få ned ruskriminaliteten ved å sende avhengige i fengsel, direkte til endå større tilgang på stoff? Berre ein månad inn i 2014 var det nemleg kverrsett like mykje narkotika i norske fengsel som i store delar av året før. I tillegg melde Aftenposten i 2015 at Noreg er eitt av landa med flest overdosedødsfall i Norden. Og i august i fjor melde Morgenbladet at dei aller fleste av dei million rusbeslaga i Europa årleg, er små dosar frå brukarar, ikkje frå langarar.

Attende i India kasta eg hasjen. Og kompisen min kom seg så vidt ut av rustilværet den gongen. Med hjelp, men utan fengselsstraff. I dag er han utdanna og i jobb. Han er klar på at øydeleggingane etter rusen er straff nok. Men hadde han vorte arrestert den kvelden på sommarleir, trur eg ikkje det hadde gått slik.