HACKING

Eva Aalberg Undheim

eva@dagogtid.no

Journalistar frå USA, Russland, Ukraina, Moldova og Baltikum er blant dei som har fått epostkontoane sine hacka av den russiske gruppa Fancy Bear frå midten av 2014 og fram til i år. Det syner ei undersøking det amerikanske nyhendebyrået AP har gjort på bakgrunn av informasjon frå datatryggleiksfirmaet Secureworks.

Fancy Bear er hackargruppa som ifølgje amerikanske etterretningsorganisasjonar prøvde å påverke presidentvalet i USA i fjor, for å hjelpe Trump til makta. Dei skal ha stått bak dataåtaka mot det demokratiske partiet, som råka både presidentkandidat Hillary Clinton sin kampanjesjef John Podesta og 130 andre demokratar.

Dei 200 journalistane som har vorte hacka, inkluderer kring 50 tilsette i New York Times og like mange i andre medium, mellom anna korrespondentar i Moskva eller russiske journalistar som jobbar for uavhengige russiske medium, ifølgje New York Times.

AP identifiserte journalistar som den tredje største gruppa offer for hackinga, nest etter diplomatar og amerikanske politikarar.

Fancy Bear er mistenkt for å ha operert under direkte kontroll frå den russiske regjeringa under den amerikanske valkampen. Dette har den russiske regjeringa nekta for. Trump har også nekta for at kampanjen hans hadde noko samarbeid med russarane.