I vår fekk Dagbladet to oste-ekspertar frå ein delikatessebutikk i Oslo til å jamføre smaken på irskprodusert Jarlsberg kjøpt i Sverige og norskprodusert Jarlsberg frå Noreg. Dei fann «en markant smaksforskjell». Det same gjorde kundane deira, som også prøvde ostane. Ifølgje Dagbladet var osten kjøpt i Sverige ikkje merkt som produsert i Irland. Det skal Jarlsberg som vert produsert på Tines nye meieri i Irland vere, forsikrar Atle Kjøl Jacobsen, i Tine Internasjonal.

I e-brev til Dag og Tid skriv han òg at kvalitetskrava til Jarlsberg-hjulet som skal produserast i Irland, kjem til å vere «heilt identiske» med Jarlsberg-hjulet som framleis skal produserast i Noreg.

Kvalitet og oppskrift

Spørsmålet vårt om den markante smaksskilnaden oste-ekspertane fann mellom dei to, får til svar at Tine har produsert Jarlsberg i USA og Irland i mange år, og osten er teken godt imot i marknaden. Det er like strenge krav til kvalitet på råvara i USA og Irland. All Jarlsberg er laga på det som svarar til norsk elitemjølk, og etter same oppskrift.

Jacobsen seier òg det er eit «klokkeklart krav» at mjølka Tine tek imot, både i Noreg, Irland og USA, skal vere utan restar av antibiotika og garantert fri for bruk av genmodifiserte organismar (GMO).

Prisen for merkevara

Cathrine Pia Lund leiar avdelinga «Merkevaren Norge», ei satsing i Innovasjon Norge for å leggje grunnlag for auka eksport og verdiskaping mellom næringar. Ho seier nasjonar, land eller merkevarer som vert oppfatta som attraktive, kan ta høgare pris for produkta sine og ser ikkje vekk frå at det også gjeld for Jarlsberg, sjølv om osten framover i større grad skal produserast utanlands.

– Det er ein styrke om vara også er produsert i landet ho kjem frå, men det treng ikkje vere noka hindring at ho ikkje er det, seier ho.

Kollegaen hennar, Oscar Kipperberg, har same oppfatning.

– Så lenge Tine står som garantist for at Jarlsberg er laga etter deira verdiar og kvalitet, treng det ikkje ha betydning for prisen det er mogleg å ta ut, seier han.