Dei to regjeringspartia er dei fremste tilhengjarane av kommersielle aktørar på velferdsfeltet. I Sundvolden-erklæringa heiter det: «Regjeringen mener i utgangspunktet at produksjon av velferdstjenester skiller seg lite fra andre tjenester. Bruk av konkurranse stimulerer til verdiskaping, bedre tjenester og effektivisering. Det er derfor helt nødvendig at konkurranse blir et gjennomgående element i offentlig virksomhet.»

Venstre og KrF er nokolunde på line med regjeringspartia her, sjølv om KrF har ytra seg kritisk om utbyte frå barnehagar og barnevern, og ønskjer å få meir innsyn i pengestraumane.

For SV og Raudt er dette ei viktig kampsak, og SV har skjerpa politikken sin på feltet. Båe partia går inn for å forby utbyte frå barnehagar som får offentlege tilskot, eldreomsorg, barnevern og asylmottak.

Senterpartiet vedtok i vår å gå mot at offentlege midlar til barnehagedrift kan gå til utbyte, og å stogge bruken av anbod i barnevernssektoren.

Delar av Ap ønskjer å stramme inn høvet til ta utbyte frå offentleg finansierte velferdstenester, men på landsmøtet i vår gjekk ikkje partiet ikkje inn for vesentlege endringar frå dagens politikk.

Miljøpartiet har ikkje flagga noko sterkt standpunkt i denne saka, men i partiprogrammet heiter det: «Vi ønsker ikke en utvikling der offentlige velferdsmidler går til å finansiere privat profitt.»