Isbreane spelar mange ulike roller i norsk natur. Ei av dei minst påakta er påverknaden brevatnet har på livet i norske fjordar. Smeltevatnet som renn ned fjellsidene i sommarhalvåret, er med på å drive vassirkulasjonen i fjordsystema.

– Når avrenninga frå breane minkar i framtida, kjem det til å endre syklusen til vatnet i fjordane, seier Jostein Bakke.

– Bresmeltinga forsyner fjordane med ferskvatn heile sommaren, og dette set fart på sirkulasjonen. Det ferskvatnet som sig utover fjorden, er med på å trekkje kystvatn inn.

Om smeltevatnet om sommaren blir borte, vil det endre heile fjordsystemet, meiner Bakke.

– Sirkulasjonen i fjordane er noko av fundamentet for oppdrettsnæringa. Ein kan meine mykje om oppdrett, men det er ei viktig næring mange stader. Og når breane forsvinn, er det òg eit stort eksperiment med økosystema i fjordane.