Spania

Eva Aalberg Undheim

eva@dagogtid.no

Valet har løyst veldig lite.

Det sa Andrew Dowling, som underviser i katalansk historie ved Cardiff-universitet i Wales, til nyhendebyrået AP då dei tre partia som er for eit sjølvstendig Catalonia, sikra seg reint fleirtal i det regionale parlamentet like før jul.

Esquerra Republicana (ERC), Junts per Catalunya og CUP fekk 70 av 135 av plassane i parlamentet, som er to fleire enn dei treng for å danne ei sjølvstenderegjering. Samstundes fekk dei berre 48 prosent av røystene, og sentrumspartiet Ciudadanos, som er imot sjølvstende, vart største parti med 37 parlamentsplassar.

Ines Arrimadas, som leiar Ciudadanos, var òg raskt ute med å påpeike at «fleirtalet av katalanarar kjenner seg katalanske, spanske og europeiske og vil halde fram å gjere det».

– Sjølvstendepartia kan aldri igjen hevde at dei snakkar for heile Catalonia. Vi kjem til å halde fram å kjempe for fredeleg sameksistens, sunn fornuft og eit Catalonia for alle katalanarar, sa ho.

Kor vidt det går mot ei ny sjølvstendeerklæring frå Catalonia er såleis ikkje openbert.

Splittingar internt

Sju av representantane som vart valde inn i parlamentet, sat før jul framleis i fengsel eller i eksil – sikta for oppvigleri og økonomisk kriminalitet, etter førre forsøket på sjølvstendeerklæring i oktober. Det inkluderer den tidlegare katalanske regionspresidenten Carles Puigdemont.

I tillegg skal dei siste vekene ha synt at det er splittingar internt i separatistleiren. ERC, som fekk 32 av plassane i parlamentet, skal ha signalisert at partiet er klart til å revurdere strategien for sjølvstende og gå for ei meir gradvis tilnærming, skriv Financial Times. Ei gradvis tilnærming vert derimot oppfatta som utenkjeleg for dei andre sjølvstendepartia, og særleg for det radikale CUP, som fekk fire av plassane i parlamentet, ifølgje avisa.

Avhengig av Madrid

Eit anna spørsmål er kven som skal leie sjølvstendeblokka. Partiet til Puigdemont, Junts per Catalunya, vart størst blant sjølvstendepartia med 34 plassar i parlamentet. Puigdemont, som har sete i eksil i Brussel sidan oktober, er derimot avhengig av at regjeringa i Madrid trekkjer tilbake siktinga mot han for at han skal kunne reise tilbake til heimlandet.

Skjer ikkje det, må både han og dei andre politikarane som sit fengsla eller i eksil, erstattast i parlamentet. Må sjølvstendeblokka ofre dei mest erfarne og populære politikarane, mistar ho og politisk slagkraft, ifølgje Financial Times.