Epistel

Walid al-Kubaisi

Det var ein gong ein konge som hadde tolv døtrer som han var glad i. Kongen merka at noko rart hende: Sjølv om han sjekka at døtrene hadde sovna om kvelden, og såg at skorne deira stod stilte opp langs veggen, var skorne utslitne om morgonen. Kongen kjøpte eit nytt dusin skor til dei, men neste morgon var dei godt brukte. Då kongen spurde døtrene om dei visste kva som var grunnen til dette, sa dei at dei ikkje visste.

Kongen sende bod til naborika om at han ynskte å få gåta løyst. Den som avslørte løyndomen, skulle få velja ei av dei tolv prinsessene til kone.

Mange prinsar og ryttarar kom til slottet for å finna svar, men etter få dagar utan løysing vart dei jaga av garde.

Ein ung mann som ville prøva lukka, la niste i skreppa og la i veg til slottet. På vegen møtte han ei gamal kone som bad om hjelp.

– Eg svelt, sa ho.

Mannen delte nista si med henne. Etterpå spurde ho kvar han var på veg. Han fortalde at han skulle til kongen og hjelpa til med å løysa eit mysterium.

– Her har du ei magisk kappe som gjer deg usynleg. Om prinsessene byd deg noko å drikke, må du ikkje ta ein sup, sa kona.

Då den unge mannen møtte kongen, fekk han klar beskjed:

– Om du ikkje løyser gåta, kjem du i fengsel.

Mannen fekk eit gjesterom vegg i vegg med prinsesserommet. Då han gjekk til rommet sitt for kvelden, kom ei av prinsessene med eit glas saft til han. I farten gløymde han rådet frå den gamle kona; han drakk safta og vart så trøytt at han måtte leggja seg. Neste kveld hende det same, men då tok han glaset med seg inn på rommet utan å drikka det. Etterpå tok han på seg den usynelege kappa og gjekk inn på rommet til prinsessene. Då ei av dei la øyret inn til veggen til rommet hans, gjekk han attende og lét som han snorka. Då han kom inn på prinsesserommet att, såg han at ei av prinsessene skauv ei seng til side og opna ei luke i golvet. Dei tolv prinsessene gjekk ned hundre trappetrinn, inn i skogen og vidare, til dei nådde sjøen. Der venta tolv prinsar ved ein båt. Den usynlege mannen gjekk om bord i båten i lag med prinsessene, og dei sigla til eit palass der det var musikk. Prinsessene dansa heilt til morgonen grydde og vende heim med velbrukte skor.

Den unge mannen fortalde kongen kva som gjekk føre seg, og kongen vart glad og lét han velje ei kone. Mannen valde den yngste prinsessa. Dei elleve andre vart triste. Kongen stengde nemleg utgangen under senga slik at prinsessene ikkje lenger kunne dansa om natta.

Walid al-Kubaisi er forfattar og fast skribent i Dag og Tid.