Epistel

Walid al-Kubaisi

Det var ein gong ein konge som ville undersøkja kor klok rådgjevaren hans var, og stilte følgjande spørsmål:

­– Kva er den verste eigenskapen mennesket har?

Rådgjevaren freista svara, men kongen var ikkje nøgd med svaret. Deretter spurde rådgjevaren medarbeidarane sine, men kongen var framleis misnøgd. Då kledde rådgjevaren seg i fillete klede og gjekk ut på gata for å høyra kva folket meinte. Svara var løgn, hovmod, arroganse og tjuveri. Alt dette hadde han høyrt før, så han snudde for å gå heim att. På vegen såg han ein gjetar som sat framfor teltet og røykte vasspipe medan saueflokken kvilte i solnedgangen. Rådgjevaren helste på gjetaren og fortalde om spørsmålet.

­­­– Grådigskap, kom det kjapt frå gjetaren som tok eit nytt magedrag frå pipa.

Brått spratt ein gullmynt frå handa til gjetaren og landa på bakken. Då han drog inn røyken endå ein gong, fall ein ny mynt ned. Gjetaren lest som om han ikkje brydde seg om myntane. Rådgjevaren undra seg og spurde kva som hende.

– Far min er ein rik mann som er glad i meg. Han gav meg fleire sekker med gullmyntar, men eg veit ikkje kva eg skal med dei.

Gjetaren fortalde ikkje at dei tre myntane var den einaste formuen han hadde, og at han i røynda var ein fattig mann.

­– Kan eg få ein av myntane, spurde rådgjevaren.

­– Ja, det kan du, men på visse vilkår, svara gjetaren.

­– Kva vilkår?

– Først vil eg at du bjeffar som ein hund, sa gjetaren.

Rådgjevaren snudde seg og sette i å gøy.

­– No vil eg at du mjauar som ein katt, sa gjetaren.

Rådgjevaren sette seg ned og mjaua ved føtene til gjetaren.

Til slutt sa rådgjevaren ja til å skryta som eit esel

– No kan du reisa heim att til kongen din med svaret og hente esel som kan bere sekkene med gullmyntar.

Rådgjevaren hoppa glad opp og drog til slottet.

­– Eg har funne svaret, ropa han til kongen.

– Kva er det?

– Grådigskap.

– Korrekt, men fortel meg kvifor!

Rådgjevaren hadde ikkje noko svar.

– Då er ikkje svaret ditt. Kven gav deg svaret?

Rådgjevaren fortalde om gjetaren, som vart invitert til slottet.

– Grådigskap kan gjera eit menneske audmjukt og viljug til å knusa sin eigen byrgskap for grådigskap, sa gjetaren.

– Korleis, ville kongen vita.

– Rådgjevaren din, som er ein av dei mektigaste i riket ditt, spelte rolla som hund, katt og esel fordi han såg tre gullmyntar.

Kongen gav rådgjevaren sparken og tilette gjetaren i staden.

Walid al-Kubaisi er forfattar og fast skribent i Dag og Tid.