Kva slags velgjerar?

5 POENG: Denne typen velgjerar har namn etter ein norsk organisasjon som vart stifta i 1990. Etter usemje vart ein ny organisasjon stifta i 2005. Det er lett å forveksle dei to namna. Heile rørsla går tilbake til eit prosjekt i Sverige i 1980-åra.

4 POENG: Den første organisasjonen har slagordet «Gatelangs siden 1990». Medlemmane er vaksne friviljuge.

3 POENG: Kvar velgjerar er uniformert i refleksvest med logo. Fasitsvaret kan òg vere ein dyreart og ein ranglefant.

2 POENG: Dei vandrar rundt for å skape tryggleik når ungdommar er ute seint.

1 POENG: Båe organisasjonane er på tynn ornitologisk is, sidan dei har ein svart kråkefugl i logoen.

Kva arrangement?

5 POENG: Dette arrangementet er årleg. Første gong var i 1939. Då hadde Clemens Krauss den sentrale rolla. Willi Boskovsky gjorde det same i ein mannsalder (1955–1979). I år var det Christian Thielemann.

4 POENG: Arrangementet når ut til rundt rekna 50 millionar. Norske sjåarar har vorte loste gjennom av Arild Erikstad i rundt 30 år.

3 POENG: Arrangementet er i bygningen Musikverein. Radetzkymarsjen kjem alltid til slutt.

2 POENG: Det er Wienerfilharmonien som speler. Utgangspunktet er musikken til Strauss-familien.

1 POENG: Førsteutgåva var 31. desember. Sidan då har konserten alltid vore dagen etter.

Kva hunderase?

5 POENG: Me kan spore denne rasen tilbake til 1800-talet. Me trur ein kryssa lokale hundar med foxhound og gjerne harrier og beagle. Mankehøgda er 50–60 centimeter. Han vart tidlegare kalla bisseberghund.

4 POENG: Han er oftast kvit med ein og annan svart flekk og raudbrun teikning. Han jaktar på hare og rev.

3 POENG: Dei seks andre godkjende norske hunderasane er desse: hygenhund, dunker, norsk elghund grå, norsk elghund svart, norsk lundehund og norsk buhund.

2 POENG: Han har namn etter ein by og kjem truleg frå der omkring. Eit anna gamalt namn er ankerstøvar.

1 POENG: Bytt ut familienamnet Anker. Me skal til Østfold.

Kva person?

5 POENG: Denne mannen er kjend under eit tilnamn som tyder lastefull, ustyrleg person. Han oppfatta seg sjølv som ein Herrens tenar, ein strannik («vandrar»).

4 POENG: Feliks Jusupov stod i spissen for drapet på han. Målet var å redde monarkiet. Liket vart funne i elva Neva.

3 POENG: Mystikaren (1869–1916) fekk makt gjennom monarkparet. Dei trudde han kunne lækje sonen for blødarsjukdom.

2 POENG: Paret var Nikolaj 2. og Aleksandra av Russland. Ein song av Boney M. fortel både sanningar og mytar om han.

1 POENG: Tilnamnet kjem av ordet rasputnyj.

Svar på hinta:

Kva slags velgjerar: Natteramn (Organisasjonane heiter høvesvis Natteravnene og Stiftelsen Natteravnene. Logofuglane ser ut som arten ramn, ikkje arten natteramn.)

Kva arrangement: Nyttårskonserten (Den sentrale rolla er dirigent.)

Kva hunderase: Haldenstøvar

Kva person: Grigorij Rasputin (Songen heiter «Rasputin».)