fire ARABISKE FILMDAGAR

Den egyptiske filmen Clash opna i går Arabiske Filmdager i Oslo, det blir vist over tjue filmar på fire dagar. Det er sjuande gong festivalen vert arrangert, og In Between og Junction er israelske filmar.

Filmane spenner over fleire sjangrar. Det er store forventningar til den tunisiske filen Min Arabiske Vår. Her er elles filmar frå Palestina, Libanon, Marokko, Irak, Tyrkia med fleire. Nowhere to Hide tek utgangspunkt i det som hende då USA trekte seg ut frå Irak. Den egyptiske filmen Clash har bakgrunn i demonstrasjonane som førte til at president Mursi frå den muslimske brorskapen vart avsett av militæret i 2013.

Det vert regissørsamtalar etter nokre av filmane.

WEIWEI MOT TRUMP

Den verdskjende kinesiske kunstnaren Ali Weiwei kommenterer president Donald Trump med installasjonar i New York. I samband med ei ny utstilling vil han byggja ei rekkje gjerde. Utstillinga med konseptuelle installasjonar fokuserer på murar som skil menneske og markerer grenser.

Weiwei forsvarar interessene til flyktningar og migrantar, og han har gitt utstillinga tittelen Gode gjerde skaper gode naboar.

Tittelen har han henta frå den siste lina i eit dikt av den amerikanske diktaren Robert Frost, som reflekterer over ein mur mellom naboar, skriv Jyllands-Posten.

SVENSKAR SVARAR TRUMP

President Donald Trump kommenterte i februar «det som hender i Sverige». Det har fått svenskane til å reagera. No har forlaget Max Ström og stiftinga Expressions of Humankind teke initiativet til eit fotoprosjekt som dei har kalla Last night in Sweden. Eit hundretals fotografar skal gje eit bilete av ein augneblink i Sverige på ein heilt vanleg kveld, fortel Dagens Nyheter.

– Når store medium lyg om Sverige, er det vanskeleg for folk i Frankrike, USA eller Russland å danna seg si eiga oppfatning. Det er viktig med ei motvekt til dette. Føremålet med prosjektet vårt er å koma så nær sanninga som mogleg. Mange av dei høgrevridde nettstadene som skriv om Sverige, har som mål å koma så langt bort frå sanninga som mogleg, seier Jeppe Wikström i Max Ström forlag.

BACHARACHS HUND i trøbbel

Den legendariske komponisten Burt Bacharach må kanskje betala dyrt etter at hunden hans gjekk laus på hundepassaren. Den 73 år gamle Joel Gaynor går no til sak mot den amerikanske komponisten, skriv The Times.

Då han passa Bacharachs hund Alfie, byrja hunden å gispa etter luft, pissa på seg og opptre rastlaust. Det viste seg at han hadde sett eit plastbein i halsen, men Gaynor greidde å fjerna det. Men då han skulle sjå til hunden litt seinare, fauk Alfie på Gaynor og beit to fingrar av han. Dei vart sydde på att, men Gaynor skal ha mista kjensla i dei. Difor går han til sak mot Bacharach.