Noreg spelte kvalifiseringskamp mot England 9. september 1981 på Ullevål Stadion – og vi vann! Dette var første gong Noreg slo England i fotball, og reporter Bjørge Lillelien kom med eit utbrot i radioen som vart lagt merke til også utanfor landegrensene. Denne norske kommentaren inngår no i Unescos kulturarv: Memories of the World.

Det er oppramsinga av Englands største namn, frå Lord Nelson, admiral i slaget ved Trafalgar 1805, fram til lady Diana, nygift 29. juli 1981, som gjer denne sigersharangen ugløymeleg, stila til statsminister Margaret Thatcher, i begeistringsrusen kalla Maggie.

Lord Beaverbrook (1879–1964) var aviskonge og luftfartsminister under sir Winston Churchill (1874–1965), som berga England i andre verdskrigen, medan sir Anthony Eden (1897–1977) møtte sin lagnad under Suez-krisa i 1956. Sosialisten Clement Attlee (1883–1967) overtok som statsminister etter krigen, medan Henry Cooper (1934–2011) var Englands store tungvektsboksar, europameister i fleire år.

No er vi over i ei grein der meisterskapskampane ofte gjekk føre seg i Madison Square Garden – og herfrå får sitjande statsminister ei siste helsing frå boksebarane utanfor: «Your boys took a hell of a beating!»

Bjørge Lillelien frå Slemmestad (1927–1987) var ein framifrå journalist og sportskommentator, utdanna i USA. Vi hugsar enno utropa hans då Ivar Formo gjekk mot gull på 50 km i vinter-OL 1976: «Saken er biff, saken er karbonade, saken er ertesuppe!»

Er denne typen improvisasjon dikt? Nei, men det er poesi.

Det at Noreg med denne sigeren likevel ikkje slo ut England frå fotball-VM i Spania året etter, svekkjer ikkje poesien. Augneblinkspoesien.

JAN ERIK VOLD