Yachtverft freda

A/S Holmen Yachtværft i Asker kommune vart freda av Riksantikvaren 16. april. Verftet vart etablert i 1918 og er faktisk enno i full drift. Holmen Yachtværft vart skipa for å byggje segl- og motorbåtar og gjennomføre vedlikehald og reparasjon av båtar, skriv Riksantikvaren på sidene sine. Verftet ligg på Landøya ved Nesbru i Asker og feirar i år 100-årsjubileum.

Holmen Yachtværft er ein representant for lystbåtverfta som vart etablerte fyrst på 1900-talet. Her på Holmen Yachtværft ser vi utviklinga frå den eliteprega seglsporten før andre verdskrig fram til den meir folkelege lystseglasen som utvikla seg etter krigen.

«Fredningen av Holmen Yachtværft er starten på et nytt kapittel i verftets lange og stolte historie. Det er helt spesielt at Riksantikvaren freder et industrianlegg som er i full drift. Bruk er det beste vern», seier avdelingsdirektør Hanna Geiran frå Riksantikvaren i ei pressemelding.

Stor utstilling vigd J.C. Dahl

Same dag som denne avisa kjem ut, opnar KODEs store sumarutstilling J.C. Dahl – Naturens kraft. Statsminister Erna Solberg står for den offisielle opninga. Utstillinga er den største presentasjonen av J.C. Dahls kunst på 30 år og viser utviklinga som kunstnar gjennom 200 utvalde meisterverk.

«J.C. Dahl definerte selve bildet av Norge. Jeg gleder meg til å åpne en stor og viktig utstilling, hvor bildene hans også kan åpne for refleksjon rundt vårt forhold til naturen i dag: Om de verdier den representerer, og om dens skjønnhet og sårbarhet», seier KODEs direktør Petter Snare i ei pressemelding.

Det fulle namnet til kunstnaren er Johan Christian Clausen Dahl (1788–1857). Han var sjølvsagt ikkje kven som helst: Dahl er ein av dei viktigaste målarane i norsk kunsthistorie, og han blir rekna som ein av Europas største romantiske målarar. Han var handverksmålaren som kom frå enkle kår i Bergen, og som seinare vart heidra som far til den norske målarkunsten.

ronny@dagogtid.no