Ein skulle tru at verda hadde kome lenger, men ha ingen illusjonar. Sjølv om tala gjekk markant ned i 2018, vert svært mange framleis dømde til døden og avretta i land rundt om i verda. Ei opplisting frå Amnestys årlege rapport om dødsstraff får fram det groteske i det heile:

Det var 56 land som dømde folk til døden i 2018, og av desse var det 22 land som faktisk fullbyrda dødsstraffer. Til saman sat 19.336 på dødscelle i 2018.

Verstingen er som vanleg Kina. Dei nektar å gje tal, men alt tyder på at dei avretta fleire tusen menneske ved skyting. Deretter kjem Iran med minst 253 avrettingar, Saudi-Arabia med 149, Vietnam med 85 og Irak med 52.

Metodane som vert nytta, er halshogging, elektrisk stol, henging, giftsprøyte og skyting. Det var ingen registrerte avrettingar ved steining i 2018, det er jo eit lite framsteg, men to vart dømde til døden ved steining i Iran. Iran hadde dessutan sju offentlege avrettingar. I Pakistan dømde dei 250 til døden i 2018 – tre av desse for blasfemi!

I rapporten står Vest-Europa fram som eit stolt friområde for bruk av dødsstraff – saman med Sør-Amerika. Hadde det ikkje vore for Kviterussland, ville heile Europa vore fritt for dødsstraff.

USA, derimot, utførte 25 avrettingar i åtte delstatar og har heile 2654 menneske på dødsceller. Ei skam for gruppa av vestlege demokratiske land. Eit fullverdig sivilisert samfunn held seg ikkje med dødsstraff.

Svein Gjerdåker

Det kjem ikkje avis langfredag.
Neste Dag og Tid kjem 26. april. God påske!