Den internasjonale lækjarbrigaden Henry Reeve bør få Nobels fredspris i koronaåret 2020, meiner solidaritetsorganisasjonar verda over, og med god grunn. Slik kan fredsprisen endeleg, vil SVs Hallgeir Langeland seia, hamna på Cuba. Men denne gongen vil det vera fortent!

Det var Fidel Castro sjølv som presenterte Henry Reeve-brigaden for verda etter orkanen Katrina i 2005, eit nytt namn på ein lang cubansk praksis. Henry Reeve var ein offiser frå USA som døydde ung på cubansk side i frigjeringskampen mot spanjolane i 1876. Castro såg det då likt å kvittera med å senda lækjarhjelp til New Orleans. President George W. Bush takka nei.

I dag har Henry Reeve-brigaden 1500 menn og kvinner i kampen mot korona i 23 land, i Europa, Afrika, Asia, Latin-Amerika og Karibia.

Kva motiv Cuba kan ha for å senda ut lækjarar i tusental, skal vera usagt. Land som kan betala, gjev Cuba inntekt i svært velkomen hard valuta, men om inntektene overstig utgiftene i landa som ikkje kan betala, er heller tvilsamt.

Kva motiv har lækjarane for å reisa ut med Henry Reeve-brigaden? Eventyrlyst, sjølvsagt – å sjå andre himmelstrok er ikkje noko alle cubanarar får gleda av – og kan hende hoppa av der. Poenget er ikkje kvifor cubanarane gjer dette, men at dei gjer det, raskt og effektivt, med stor risiko for eiga helse, og at mottakarane har få alternativ.

Fredspris til Henry Reeve-brigaden ville leggja ein liten stein til børa for Trump-regjeringa i USA, som åtvarar land som tek imot helsehjelp frå Cuba: Dei underbetalte cubanske lækjarane er offer for statleg menneskehandel, lyder twittermeldinga frå Det kvite huset, som på same tid freistar lokka til seg lækjarar frå fattige land til koronateneste i USA. Så lenge dei ikkje er cubanske. Ein fredspris frå Noreg mot virus og maktarroganse ville vore framifrå.

Johan Brox

Med denne utgåva tek Dag og Tid ferie. Neste utgåve kjem fredag 7. august. Vi ynskjer lesarane våre god sommar!

Redaksjonen